أدفع تمن صلاتك .... تدخل الجنة حدف

احجز مجلسك من الان, فالاماكن محدودة, و الصفوف الاولى قليلة ومحدودة

ليه تصلى ورا, مادام ممكن تصلى قدام, و لو هتدفع اكتر ممكن نوقفك بدل الامام

مكانك فى الجنه انت الى بحددة بألى النهاردة هتدفعة

أستنهز الفرصة, و الحق مكان ليك فى رمضان, و معاك شهادة ضمان, لو مدخلتش الجنة, ابقى قابلنى

*****************

ترررررررررررررن تررررررررررررررن
-الو
-السلام عليكم ورحمة الله وبركاته
-وعليكم السلام
-الاستاذه هبه؟
-ايوه, مين معايا؟
-احنا جمعية.....الخيرية, حضرتك حضرتى معانا امسية قبل كده
- ايوه الى هى بتاعه أبراهيم الفقى و مصطفى حسنى
-اه, حضرتك فى أمسية جديدة للداعية ........... يوم 2 رمضان
- طب كويس, ده الى فى نادى لاجون
-لا, ده هيكون فى قاعة ميراج, هيصلى بنا التراويح و بعدين هيدينا درس
- و هيصلى فين؟ فى مسجد ميراج ولا فى مسجد برا؟
- لا جوه القاعة نفسها حضرتك, و الأمسية هتبدأ ان شاء الله الساعه 7 ونص
- طب تمام, و ادفع ازاى و لمين؟
- حضرتك, مقر الجمعية فى لوران , و الامسية مفتوحة, يعنى حضرتك ممكن يجى اى حد , و السعر, الصفوف الأولى ب35 جنية و الصفوف الخلفية ب25 جنية, و الصفوف الامامية محدودة
-طب شكـــــــــــــــــــرا

*****************

مكانك فى الصلاة, ما بقاش بهمتك ولا بانك تيجى بدرى, لاء بقى بمقدرتك المالية
ببساطة كانت ممكن تقول التذاكر ب 25 و ب 35 وبس
طبعا معروف ان الأثمان دى للندوة مش للصلاة, بس برضة هل الصلاة مفتوحة لأى حد, لاء طبعا
و ليه لاء, ممكن يجى اليوم علينا الى تبقى فيه مساجد خاصه مش للعامة, ياى أنا اصلى مع الناس البوي ستيبو خالص دول, يا مامى نيفر
بجد انا ماعنديش كلام أكثر, كان مجرد موقف و عدى عليا و قلت اسجلة عشان حسيته مهم

*****************
يالا قرب قرب, عندنا المسجد الفللى, و الدخول ب5 جنية بس يا جدعان, مش هتلاقى الناس الشعبين واقفين جمبك فى الصلاة, و الشيخ بتاعنا أخر تفتيح دماغ, بغمزة صغيرة يخلصك, و صلاتك مقبولة على ضمانتة, و كام بيبى كام بيبى كام