Monday, February 23, 2009

ورقة بيضة

قلبى ورقة بيضة مقطوعة
لا حد كتب عليها.... ولا إتشافت حتى
ورقة مرمية على أرض أسفلت فى يوم مطر
الرايح والجاى بيدوس عليها ولا شايفها
ومع اخر نقطه مطر... بقت بسوى أسفلت الطريق
و لونها بيقلب على أسود غطيس مع كل ضربة قدم
بس فضل فيها جزء أبيض كان مطوى
محمى من باقى الورقة
حست الورقة انها لسه ورقة... ليها لازمة
و أول ما جت تشم نفسها.... وتحاول يقومها قومه
عدى طابور عسكرى بضربة قدم واحده
هبدوا الهبده.... فوق طراطيف الورقة البائسه
جابوا ضلفها
كمل الطابور مشيته لمكان مجهول
وبقيت الورقة ياعينى تنوح .... على أمل مكملش ثوانى
ورغبه ماتت قبل ما تتولد
و الورقة البيضه بقت صدى ضعيف فى دنيا الزحام و الأصوات
لاعمرها أتحست ولا حد درى بحكايتها

3 comments:

  1. :)

    "بس فضل فيها جزء أبيض كان مطوى
    محمى من باقى الورقة

    معلش بقي اسمحلي .. يعني الواحد يحمي نفسه بانه ينطوي علي نفسه .. دا كلام
    ولا معناه الكلام ايه .. واللي افهمه من تاكيده لما .. الورقع اتهبدت تحت رجلين العسكر وقت ما فكرت تشم نفسها

    ReplyDelete
  2. ماكنش المقصود الأنطواء على النفس على قد ما هو فى احلك الظروف الى بيتعرض ليها الانسان و فى قمه يأسه هيفضل جزء برضه لسه فيه الأمل
    حتى لو هو مش متوقع وجوده حتى
    انت ليك حق الاعتراض على ان المغزى مأساوى بعض الشئ
    لأنه فعلا كده
    مش عارفه ليه دايما بميل للمأساويه فى الأفكار
    سعيده بمرورك و بتعليقك جداااااااااااااا

    ReplyDelete
  3. http://asaas27.blogspot.com/2012/01/blog-post_30.html

    لأ.. ما ماتتش .. ومهما حصلها .. حتلملم بعضها .. وحترجع لأصلها .. ولما النسيم حيعدي .. حتدور وسط الطيور .. وتطير فوق البحور .. في ضلمة ولا نور .. حتفضل ورقة بيضة .. دا هو دا أصلها .. دا هو دا قلبها ......ـ

    ReplyDelete