Tuesday, April 22, 2008
Sunday, April 20, 2008
Monday, April 7, 2008
فلقة فى شيش
صوتك فلقة فى شيش شباك
فى أوضة طفل فقير و يتيم
بتدخل صرصوب هوا
سائع و صاروخ
فى عز الشتا و النوات
**********
و بصوت مبحوح ... من كتر البرد
يصرخ و يقول
سدوا الشباك... مشوا الحراس
من ورا بابنا ... سيبوا حياتنا
تمشى كده بما يرضى الله
**********
فكوا اديكوا ... من على قلوبنا
القابضة عليها ... و غارزة فى عقولنا
**********
سيبوا نفسنا ... يشم هوا الصبحية
و لو مرة ......
ادوا الفرصة للى يستهلها و يقدرها
و لو مرة ......
سيبوا الحياة ترجع لأصلها الحلو
و ننسى العيشة المرة
Saturday, April 5, 2008
Wednesday, April 2, 2008
صوتك بيبان
حسك طلع
صوتك و قام
هز الكيان ....... و زلزلة
********
صوتك بيبان
فتح عيونا المكممة
على دنيا واسعة
خضرة و مياة .... اهل و احبة
دايما هنا
********
لكن بيبانا المقفلة
مانعة الرؤية
نسمة و نور
توصل لعيون
عاشقة الظلام .... عاشقة الخنوع
كارهة الحرية
و التجربة
********
خايفة ليوم تخرج .... تموت او تتخنق
خايفة لتنجح
خايفة لتبقى نفسها
حابه الوجع .... و الهمهمة
********
لنفس حايرة
مش مركزة
لودن طارشة
مبتسمعش الا صوت
النواح و البكا
********
اضراب عام لشعب مصر...6ابريل
اتسألت ايه رأيك فى يوم الأحد؟ جاوبت و قلت قصدك الاضراب؟
اتقالى ايوه
بتاع 6 ابريل؟
اتقالى ايوه
قلت مبدهاش اقول رأيى وعوضى على الله
اضراب عام للبلد كلها!!!-
حاساها مزودينها شوية
اصل مفيش حاجة فى الدنيا ى اسمها ان كل شئ يقف
كل شئ
مينفعش
متحصلش
متجوزى
اضراب عام للبلد كلها!!!-
حاساها فوضى و عشوائية
حاساها فوضى و عشوائية
و الفوضى مش شرط تكون بالصوت العالى و الدم و الحرايق
مش شرط تكون تخريب
الفوضى هى التفكير غير المنظم
و الفعل الاحمق
اضراب عام للبلد كلها!!!-
اليوم ده نتيجته حاجة من اتنين
* يا اما يحصل تغيير شامل و جذرى فى كل قطاعات الدولة , و تبديل فورى فى كوادر و قيادات المناصب العليا
* يا اما مش هيحصل اى حاجة فى اى حته
الاولى :اعتقد انها درب من المستحيل
و التانيه: هتسبب حاجة من اتنين
- يا اما : نكرر عملية الأضراب تانى و تالت و رابع, لحد ما البلد تقف تماما, و تبقى فى حالة شلل كامل و مستشرى
- يا اما : الشعب هتزيد عنده حاله الخنوع و اللامبالاه و يرمى طوبة البلد للأبد, و يغرق فى الذاتيه
و اعتقد ان الحل التانى هو الاوقع من بين كل الحلول و البدائل, لانه الاميل لكل الى بيحصل حوالينا و الاسلم للجميع
و حكومتنا هتعتبره يوم اجازة من العمل, و يوم صيام من الشعب, و يوم الصحة العالمى عشان مفيش مرضى
و دمتم
اضراب عام للبلد كلها!!!-
تفتكر لو احنا فى حالة حرب, او العين علينا, او مرصودين, او ان فى بلد نفسها تحتلنا
مثلا يعنى
تفتكر يعنى - و انا بقول يعنى- مثلا
ميكونش يوم 6 ابريل ده, افضل يوم يعملوه عملتهم فيه؟
و يبقوا هيلا بيلا جوه قلب البلد
حد هيرد عليا و يقولى
لا... لأن الشرطة و الجيش يكونوا فى وحداتهم و فى حاله الاستعداد, و ان استحاله يكون الاضراب ثغرة فى جسم البلد
هقوم ارد عليه واقولوا
تفتكربلد شعبها بجنوده ساخطين بالشكل ده, و نص الجيش و كل الشرطة و الامن المركزى هيكونوا فى الشوارع علشان يكتموا الشعب و يبردوا دمه, او يسيحوه- الاقرب و الاسهل طبعا
ما يكونش ثغره؟
انا معاك انه مش ثغرة, ده فتق فى بنطلون البلد من ورا, لا بيداره و لا بيترف
قوم ايه حد تانى يقولى
لا لا انت بتسرحى بخيالك بعيد قوى
حرب ايه؟ و احتلال ايه؟
هقم ارد عليه و اقولوا هو ممكن يكون احتمال بعيد, و لكنه مش مستحيل
لأننا فى وسط منطقة على حافه برميل بارود على رأى مراسلة حيفا
مع ملاحظة ان اسرائيل بدأت توزع اقنعة الغازات الكيمائية على شعبها بالكامل, تحسبا لأى قنابل تتحدف عليها و قد تكون قنابل غير طبيعيه, لأنهم ناوين يدخلوا فى حرب كبيرة و شاملة على كافه حدودها, المصرح به حتى الان شمالا على لبنان و جنوبا على غزة
كلمة كده من عندى, و قد تكون غربا على مصر
اضراب عام للبلد كلها!!!-
مش عارفة ليه حاساها لعبه كبيرة و بنتساق ليها
و اننا بنتساق بهبالة ناحية اتجاة , مفروض منمشيش فيه
اضراب عام للبلد كلها!!!-
رأيى و من الاخر
انه فعل احمق فى بلد حمقاء
.........................................................................................................
ملحوظة: المراسله المقصوده: مراسلة قناه ال lbc
و اشكر معتز و صبرى, الذى دارت بيننا الحوارات حول هذا الموضوع
Subscribe to:
Posts (Atom)