اتسألت ايه رأيك فى يوم الأحد؟ جاوبت و قلت قصدك الاضراب؟
اتقالى ايوه
بتاع 6 ابريل؟
اتقالى ايوه
قلت مبدهاش اقول رأيى وعوضى على الله
اضراب عام للبلد كلها!!!-
حاساها مزودينها شوية
اصل مفيش حاجة فى الدنيا ى اسمها ان كل شئ يقف
كل شئ
مينفعش
متحصلش
متجوزى
اضراب عام للبلد كلها!!!-
حاساها فوضى و عشوائية
حاساها فوضى و عشوائية
و الفوضى مش شرط تكون بالصوت العالى و الدم و الحرايق
مش شرط تكون تخريب
الفوضى هى التفكير غير المنظم
و الفعل الاحمق
اضراب عام للبلد كلها!!!-
اليوم ده نتيجته حاجة من اتنين
* يا اما يحصل تغيير شامل و جذرى فى كل قطاعات الدولة , و تبديل فورى فى كوادر و قيادات المناصب العليا
* يا اما مش هيحصل اى حاجة فى اى حته
الاولى :اعتقد انها درب من المستحيل
و التانيه: هتسبب حاجة من اتنين
- يا اما : نكرر عملية الأضراب تانى و تالت و رابع, لحد ما البلد تقف تماما, و تبقى فى حالة شلل كامل و مستشرى
- يا اما : الشعب هتزيد عنده حاله الخنوع و اللامبالاه و يرمى طوبة البلد للأبد, و يغرق فى الذاتيه
و اعتقد ان الحل التانى هو الاوقع من بين كل الحلول و البدائل, لانه الاميل لكل الى بيحصل حوالينا و الاسلم للجميع
و حكومتنا هتعتبره يوم اجازة من العمل, و يوم صيام من الشعب, و يوم الصحة العالمى عشان مفيش مرضى
و دمتم
اضراب عام للبلد كلها!!!-
تفتكر لو احنا فى حالة حرب, او العين علينا, او مرصودين, او ان فى بلد نفسها تحتلنا
مثلا يعنى
تفتكر يعنى - و انا بقول يعنى- مثلا
ميكونش يوم 6 ابريل ده, افضل يوم يعملوه عملتهم فيه؟
و يبقوا هيلا بيلا جوه قلب البلد
حد هيرد عليا و يقولى
لا... لأن الشرطة و الجيش يكونوا فى وحداتهم و فى حاله الاستعداد, و ان استحاله يكون الاضراب ثغرة فى جسم البلد
هقوم ارد عليه واقولوا
تفتكربلد شعبها بجنوده ساخطين بالشكل ده, و نص الجيش و كل الشرطة و الامن المركزى هيكونوا فى الشوارع علشان يكتموا الشعب و يبردوا دمه, او يسيحوه- الاقرب و الاسهل طبعا
ما يكونش ثغره؟
انا معاك انه مش ثغرة, ده فتق فى بنطلون البلد من ورا, لا بيداره و لا بيترف
قوم ايه حد تانى يقولى
لا لا انت بتسرحى بخيالك بعيد قوى
حرب ايه؟ و احتلال ايه؟
هقم ارد عليه و اقولوا هو ممكن يكون احتمال بعيد, و لكنه مش مستحيل
لأننا فى وسط منطقة على حافه برميل بارود على رأى مراسلة حيفا
مع ملاحظة ان اسرائيل بدأت توزع اقنعة الغازات الكيمائية على شعبها بالكامل, تحسبا لأى قنابل تتحدف عليها و قد تكون قنابل غير طبيعيه, لأنهم ناوين يدخلوا فى حرب كبيرة و شاملة على كافه حدودها, المصرح به حتى الان شمالا على لبنان و جنوبا على غزة
كلمة كده من عندى, و قد تكون غربا على مصر
اضراب عام للبلد كلها!!!-
مش عارفة ليه حاساها لعبه كبيرة و بنتساق ليها
و اننا بنتساق بهبالة ناحية اتجاة , مفروض منمشيش فيه
اضراب عام للبلد كلها!!!-
رأيى و من الاخر
انه فعل احمق فى بلد حمقاء
.........................................................................................................
ملحوظة: المراسله المقصوده: مراسلة قناه ال lbc
و اشكر معتز و صبرى, الذى دارت بيننا الحوارات حول هذا الموضوع
مع ان كلامك شكله منطقي الا انه معلش يعني رفع ضغطي
ReplyDeleteوانا بارد لاني حاسس انك بتتكلمي بعقلانية مش اي كلام وخلاص وبالتالي يبقى في امل في اننا نتحاور وياتقنعيني يااقنعك
اولا حكاية الاحتمالات اثبتت الايام ان فيه احتمال تالت وهو اللي حصل يعني لاده ولاده حصل بس بنسبة
حكاية الاعتراض والفوضى فبالعكس
دي حاجة غاية في الرقي بس للاسف لو كانت الحكومة والسلطات نظمتها وتعاونت معهم ماكانش حصل ده وكانوا هم نفسهم ارتاحوا يعني
هيجرى ايه يعني لما ياخدوا يوم اجازة كأنه يوم عيد ماهي الاعياد مالية البلد عيد العمال وعيد ايه وعيد ايه
يعني خلاص ماجاتش على اليوم ده لو تم تنظيمه وسمح للناس بقول رأيها بشكل حضاري
لكن اللي حصل هو اضطهادهم والحكاية دي اعتقد انها هتطور وبالتالي هتبقى عملية ثأر مش مجرد مطالب
كمان هو ده الحل الوحيد اللي في ايد الناس في ظل الاستبداد ورفضهم لان عندهم عقل لفكرة الارهاب يبقى باقي ايه اني افضل زي ماانا كده ساكت وسلبي وهو ده حال الاغلبية
لكن الحل التاني هو اعلان الاعتراض على الاضطهاد الحاصل وباسلوب حضاري ومنطقي وبيحصل في كل الدول حكاية البلد كلها فدي عشان الامن والدولة حولوها لمعركةوهم عندهم هوس في حين انها حاجة بسيطة لكن هم كبرووها اوي
هي مجرد اعلان عن الاعتراض عن كل مايحدث من جوع وفقر واضطهاد
بس
اولا احب اشكرك على تعليقك , و انك صبرت تقرا الموضوع مع انه معجبكش
ReplyDeleteو سامحنى على رفع الضغط
عندى دى
و بما اننا متفقين ب يا تقنعنى يا اقنعك
برضة لازم نتفق ان الاختلاف لا يفسد للود قضية
اما بعد
هحاول برضة ابقى مرتبة ارد على نقطة نقطة
- فكرة الاحتمالات, نقطة انت صح فيها ان ظهر احتمال ثالث, بس خلينا نتفق الاول, الاحتمال الثالث الى هو ايه؟؟ الى هو تكسير البلد و و تخريب الممتلكات
نكسر بيتنا الى عايشين فيه
و نسرق بعد
نموت و نصاب و نتعطل!!!
لو هو ده الاحتمال الثالث, يبقى اعذرنى يا له من ثمن
يثبت برضه رأيى انى ما اشاركش فى تحقيقة
- نقطة 2:نقطة الاعتراض و الفوضى: الاعتراض انا معاك انه فعل راقى, و لكن لابد انه يكون مدروس, اما بقى الفوضى رقى؟؟
اسمحلى ... عفوا انى اعترض معك و بشده
الفوضى ليست رقى و انما همجية و فعل بلا تفكير و بدون عقل
- اسمحلى ارجع تانى لنقطة الاعتراض, انا لست فعل الاعتراض فى حد ذاته, و لا الاضراب المؤقت , و اكبر دليل على ذلك, ان كنت من المشاركين فى اضراب اعضاء هيئة التدريس, انما الفكرة ان الاعتراض لابد و ان يكون مدروس
فى حاجة كده انا بقتنع بيها
هى ان لما تقرر انك تهاجم نمر لست فى مثل قوتة, لابد ان تعوض نقص القوة بالدهاء
يقفلك سكة تدخلة من تانية, انما يكون من الغباء انك تدخل فى سكة انت عارف انها سد
اللعب مع الحكمة , لابد و ان تتحايل ا بمعنى ارقى
تكون سياسى محنك
عارف الفعل دارس كل احتمالاته عارف انت بادى منين و رايح فين
- ل تحب رأيى فى الاعتصام او الاضراب او الاعتراض
انا كان رأيى ان يكن فى اعتراض, بس اعتراض او فعل يشكل خطوة للامام ليست للخلف
و هديك مثل
معملناش ليه يوم الاعتراض ده
بدل ما نتعطل عن اعمالنا و نوقف حال البلد
اننا كنا نراقب صناديق انتخابات المحليات غدا
البلد كلها تروح ترشح و تراقب الصناديق
وعملناش ليه يوم العمل الجاد, نشتغل كلنا بذمة
او الشعب كله محدش مثلا يصوت فى الانتخابات غدا
او البلد كلها ترفع قضيى على احمد غز
او تطالب بأسقاط الحكومة
الاحتمالات كثيرة بلا حدود
فعل يكون له مردود ايجابى و ليس سلبى
-اما فكرة ان الحكمة تنظم اليوم عان ينجح
انا شايفة الجملة دى فيها تناقض كبير
اذا كان اليوم ضد الحكومة و يطالبها يتغيير سياستها, يبقى هى هتبقى تنجح اليوم الى يسقطها؟؟ بالعقل متركبش
-اما فكرة اقعد فى بيتك كانه يوم اجازة, معلش انا مقبلهاش على نفسى انى اخدع لتنفيذ فكرة لست مقتنعة بها, بالعكس لازم كل واحد قاعد فى بيته يكون مقتنع من جواه بالى بيعمله
و على فكره سبب من اسباب التخريب الى حاصل ان العيال دول مش مؤمنين بالى بيعملوه مع جهلهم ادالنا تخريب
لو بصيت فى وشوهم
هتلاقيهم مش غاضبين و انما فرحين و كانهم فى نزهة
و اخيرا عشان يبقى الاعتراض حضارى, لازم تكون مؤمن ب 100% و لازم تكن فبه حملات توعية للناس الى الطاحونة واكلاهم و مش مركزين, نقدر نقل عليهم الجهلاء مجازا عشان ميحصل زى الى حصل امبارح
و اخيرا اسفة على الاطالة اتمنى اسمع رد منك قريب
للأسف أحنا لسة ماوصلناش .. لا شعب ولا حكومة... للتحضر في الحوار
ReplyDeleteيعني لما الناس قالوا هايعملوا إضراب الجرايد تاني يوم كتبت عاوزين تاخدوا حقوقكم يبقي بالحوار طب ماحنا عمالين ندن في مالطة من زمان وماحدش عاوز يسمع لنا
والمشكل علي عينكياتاجر والبهوات عاملين نفسهم مابيسمعوش
كان لازم وقفة
أنابأسميهاوقفة تهوييش
مش أكتر