Saturday, February 2, 2013

رباعيات تنفس الكتمان



(1)
معرفش غير ضربكم للموت افضاني
واشكي لمين واجعتى واقول اه يانى
على الي باع واشتري بالذل وبنارنا
ووقف فى وسط الخلق وقال ماهوش آني

*********
(2)
حزنى فى قلبي محبوس يجيله سنين
والدمعه فى عينى ماهيش عارفه طريقها فين
اقعد ... اقوم ... منين السكة ياخواتي!
انا انسان بحس ولا اصلي رغاوي صابون

*********
(3)
خليك فى حالك ياض, وانت مالك بالى ماتوا
يكونوش من بقيت اهلك، ولا ليك بيقولوا هاتوا 
ما الى مات اندعق، والى مسك علي
خليك فى لقمة عيشك ومن سرقة الكيا سيراتو*

*********
(4)
يا حسرتى على عيون راحت ومجوش
وعين سهرت تدعى للي مرجعوش
يا هل تري الحزن استكفى من بلادنا
ولا اشباح الموت لسه مستكفوش؟

*********
(5)
امبارح كنا سوا فى الميدان قاعدين
بنقسم اللقمة بينا ومكوناش خايفين
قمت ليه يا خلى، وسبتنى لوحدي ضعيف
يا تري الحق مع مين؟ ولا احنا الاثنين غلطانين!!!

*********
(6)
زرت فى طريقي مدن كتير
الى اهلهم اغنيا والى فقرانين
بس العجب والى استفذني
بلد جميلة قوي بس اهلها كلهم رغايين

*********
(7)
بصرخ فى وش العالم وبعزم ما في
ياهوو يا بشر يا خلق ده انتوا مراكبيه
فى مركب اصلا ورق بلا قلوع ولا مرسي
ترسي عليه، بس هى على الشط مستنيه

*********
(8)
"هااع مين هناك" .. رضيت وقلت متخافش
منيش بعبع ولا عفريت من السما نازل
دا انا يادوب مواطن ماشي فى سكتي
ومليش دعوة بلي فى البلد حاصل

*********
(9)
ومنين اجيب النوم يا اهل العلم دلوني
عنيا جفاها النوم والاطباء ما داوني
فكرت فى يوم اهب فى وش الظلم ولو مره
طارت عيونى بخرطوشه بيها صابوني

*********
(10)
يا حزني على خرج فى يوم ولا عاد
ما كان لي غيره سند بعد الى فاتنى ومات
يا هل تري كنت احبسه ولا اضربه؟
ولا اسيبه يروح لقدره فى الميعاد

*********
(11)
حبك يا وليدي فى قلبي محل النبض
ومن يوم مولدك وانى ندراك للبلد ندر
فداها انت وفداها اني بس تبقي هي بهيه
بس راحوا الكل والمولد خلاص انفض

*********


* فى هذا الوقت كان يوجد لغز عظيم يدعة سرقة عربات الكيا سيراتو بالأخص, والسبب كما يشاع سرقة المفتاح الاصلي من التوكيل

No comments:

Post a Comment