Sunday, August 12, 2007

الحمد لله

يـــاه مده طويلة سايبه البلوج
وحشنى قوى, و حسيت انى بلا هدف طول المده الى فاتت, من غير انتمائى للبلوج
فعلا, الانسان لازم يحس انه منتمى لحاجة, مسئولة منه, و مسئول عنها
لازم يحس انه ليه لازمة و معنى فى الدنيا
انه بيعمل حاجة هو بيحبها
نرجع تانى لغيابى, معلش, اصلى كان ورايا حاجات كتير قوى الفترة الى فاتت
و حصلتلى حاجات اكتر
الاول كنت بصيف, عقبال عندكم
قبل ما اصيف ولما كنت بشتغل, ماكنتش حاسه بمدى احتياجى انى افصل دماغى
بس اول ماسبت اسكندرية و طلعت على الصحراوى, حسيت قد ايه احتياجى لفصل الكهرباء عن ماكنه الشغل و المدنية
و تخيلت انى لو كنت اشتغلت كمان يوم. ممكن يجيلى انهيار عصبى
اول مره احس الاحساس ده, بمدى احتياجى للفصل و هدوء البال, يمكن لأنه اول اجازة ليه فى الشغل, مش عارفة
بس كنت فى كل لحظة بحمد ربنا على استمتاعى بالهدوء, مع ان المكان الى كنت بصيف فيه, متعوده عليه من و انا عندى 7 سنين مثلا, و يمكن ماكانتش اسعد اجازة فى حياتى
بس حمد ربنا , كان على الفرصه, انى عندى المقدرة على تغيير الجو
الحمد لله
ده كان اول اسبوع فى اختفائى
رجعت من الساحل يوم الخميس الصبح, يا دوب نمت ساعتين, و نزلت جرى على بيت هبه صديقتى للتحضير لخطوبتها... اصلها اتخطبت
بجد كان يوم حلو قوى, ربنا يباركلها يا رب و يسعدها
كان يوم مرهق, بالمعرفة انها ساكنه فى الدور التاسع, و يومها الاسانسير باض
و اديتها مرتين ثلاثه طلوع, نزول على السلالم
الثلاثاء الى بعده, كانت حنة مى, صاحبتى برضه
كان يوم حلوو قوى كمان, ماشاء الله
بجد ربنا يباركلها هى و محمد ان شاء الله
هيصنا و فرحنا ... الحمد لله
الخميس بقى كان فرحها... طبعا يومها كان كله ترتيب للفرح
بجد ما شاء الله
تحس بالفرحة فى عيون مى و محمد, و سعادتهم. نادر لما تلاقى العرسان على طبيعتهم , و السعاده فعلا تحسها فى كل حركة
حط بقى فوق ده كله, ان مامه و بابا مى-عمو اشرف -ناس تجبرك على حبهم
ربنا يديم الحب و الالفه ما بينا يا رب
عيلة , تحس معاها انها عيلتك فعلا, بيحبوا كل الناس و ناس جميلة بجدفاضل بقى حاجتين تانين حصلوا فى الفترة دى, هسيب تفاصيلهم لمرة جايه, بس بأختصار هما املين
اول امل حصل: فكرة ورشه فنيه للكتابة, اتمنى انى اقدر اعمل فيها حاجة, ان شاء الله
تانى امل: دينا السيد. فاكرين موضوع المحطات؟ المحطة الرابعة؟ الى بتفضل باصصلها حتى لما تسيبها.
انا ماكنتش متخيلة انى ممكن اقول الكلمة دى فى الفتره دى. بس دينا اول محطة رابعة تقابلنى فى حياتى
التفاصيل بقى فى موضوع تانى , هيبقى مخصوص عن دينا السيد, فرحتى الى لاقيتها
انا بحمد ربنا على كل لحظه عايشاها فى حياتى, و على ان الفترة الى فاتت كان فيها كذا حاجة حلوة حصلتلى
الحمد لله على كل شىء

5 comments:

  1. 3ala fekrah begad begad elblog beta3ek yeganen w a7la 7agah feh eno active..mesh ma3lomat ba2a w kedah la2 actions enty 3amlatiha w ra2yek fiha w mawdo3 elmara 2elly gaya dah ,,feh tashwik kaman
    keep going ;)
    nancy

    ReplyDelete
  2. thanks ya nancy
    we el7amdoellleah eno 3agebk.
    i hope eno yekon bey2adem 7aga
    yemken ye3raf el nas 3laay
    yemken akon ba2adem tagroba
    yemken 7ad yestafed menha
    i hope so

    ReplyDelete
  3. احنا عالاطول بنتعلم منك يا هبه ودايما مواضيعك بتبقى لذيذة وحلو النيو لووك اللى انتى عاملاه للبلوج حتى اللون الازرق بيهدى النفس ويريح الاعصاب ولاانتى ايه رايك ؟؟

    ReplyDelete
  4. هبة انا حعيط قعدت اكتب رد ف الاخر ماتبعتش يلا من الاول عشان الحبايب :)
    بصى الاول حمد الله ع السلااامة وماتغيبيش تانى
    تانى حاجة " الانسان لازم يحس انه منتمى لحاجة, مسئولة منه, و مسئول عنها
    لازم يحس انه ليه لازمة و معنى فى الدنيا
    انه بيعمل حاجة هو بيحبها"
    كلام جامد ومعبر اوى
    ثالثا "و يمكن ماكانتش اسعد اجازة فى حياتى
    بس حمد ربنا , كان على الفرصه, انى عندى المقدرة على تغيير الجو
    الحمد لله "
    حسيت ان انت ما شاء الله عندك رضا
    يا رب تفضلى كده وتشوفى الحاجات من كل جوانب ليها
    وكمان ألف مبرووووك لهبة ومى وربنا يتمملهم بخير وعقبالك ومستنيين موضوع دينا السيد ف الحلقة القادمة
    سورى طولت عليكى

    ReplyDelete
  5. Resho: شكرا يا احمد على المجاملة بالنسبه (لبنتعلم منك)دى
    انا بس بقولنى. عشان الناس تعرفنى. عشان اكون على طبيعتى
    و بالنسبه للنيوو لوك. انت ليك فضل فى تهديه الاعصاب دى
    شكرا على النصيحه و المشاركة
    Hanona: بالنسبة للرد الى موصلش, انا مقدرة مشاعرك جدا, لانها حصلتلى فى رد كان طويل جدا, و بصراحة لما راح ماحاولتش انى اكتبه تانى. و جالى احباط
    عقبالك انتى يا حنونة, و نفرح بيكى دايما يا رب, فى كل خطوة بتعمليها فى حياتك. ان شاء الله هحاول ماتأخرش, و موضوع دينا السيد, انا هستأذنك مش هيبقى علطول, لأنى بمخمخله.
    و خليها مفاجأه
    و بالنسبه للرضضا, الحمد لله, اتمنى انى اكون زى ما بتقولى
    بس فعلا حستها قوى السنة دى

    ReplyDelete