Monday, July 23, 2007

محطات

محدش يقدر ينكر ان الدنيا دى مش الجنة, و لا كلها اوقات سعيدة, و لا كل تجاربنا فيها تجارب تعيسة و محزنة

الدنيا هى الدنيا , فيها كده وكده. و حياتنا هى حياتنا, فيها الاوقات السعيدة و الاوقات المحزنة
انما ليه لما بحب افتكر تاريخى فى الحياة, بحس دايما ان الحزن كانت مدته طويلة قوى, انما الفرح بيبقى لحظات!
النهاردة انا مش ناوية اتكلم عن اللحظات السعيدة, و انما فكرة كده فى دماغى, و عايزة اتكلم عن لحظة حزينة
فى رأيى ان ماضى الانسان بيتكون من تجارب بيمر بيها, وبيعشها. و بيتبقى التجارب دى عبارة عن محطات.
فى محطة حياتك مش بتقف عندها و لا بتاخد بالك منها
و فى محطة تانية بتهدى عندها شوية و تلمحها من بعيد بس ما بتوصلش انك تقف عندها
محطة غيرها تقف عندها تبكى علي اطلالها, و تقضى شوية وقت هناك, و تفضل روحك متعلقه بيها فترة من حياتك, بس بتقدر فى الاخر انك تعديها و تفوتها, و لما تفتكرها بعد كده ما بتمثلش بالنسبه ليك الا تجربة و عدت
اما اسوأ المحطات, فهى تلك المحطة الى حياتك كلها بتقف عندها, حتى بعد ما للمحطة تعدى و تكمل مشوار حياتك, تفضل عنيك عليها و فاكرها دايما. و تصبح كأنسان ماشى بظهرة فى طريق سريع مليان عربيات نقل
كل ما تفتكر التجربة الى مرت بيك دى, تلاقى مشاعرك ما هديتش, و كأنك لسه بتعيش التجربة من اول و جديد. و كان عمر لم يمر عليها
مش هطول اكتر من كده, لأنى حابه ان كلامى يبقى من خلال الردود
(ده لو هيبقى فى ردود من الاصل) ة
.
انا هتكلم شوية عن محطة من النوع الثالث فى حياتى
.
كانت فترة من النوع الاربع – بتاع عربيات النقل - بس الحمد لله قدرت انى اتخاطاها و انقلها للمرحلة الثالثه.
طبعا اكيد كانت فترة صعبه على اى حد, انه يخسر اعز صديق ليه, و على حاجة بسيطة, بس هى فعلا مش بسيطة بالنسبة للأصدقاء. انك تحس انك بالنسبه لصديقك ماتفرقش معاه. او انك بالنسبه له –استبن- و الله لقيت الى يملى وقتى و يسلينى اكتر منه, و ايه المشكله , تتركن فى شنطة العربية. انا طبعا متأكده ان صديقتى ما كانتش بتفكر بالاسلوب ده, بس وصلى انا كده.
مش هتكلم طبعا بتفاصيل, لأن الشخص ده يهمنى, و انا دوقتى بحبها زى زمان بس مش اكتر طبعا.
أكتر حاجه كانت بتألمنى وقتها, ان صداقتها كانت جايه فى وقت انا محتاجلها فيه جدا, و هى كانت عارفة كده, و الوقت الى اتفقنا فيه, كنت فى اشد الحاجه اليها.
وقتها كنت فقدت الايمان بالصداقه – و لو بشكل مؤقت – و عرفت ان الواحد لما يقرب من حد قوى, بينجرح منه بسهولة, و الجرح بيبقى قوى
بس الفترة دى كنت ترجمت مشاعرى فى كلمات, يمكن تبقى اوضح , و اكيد اعنف
بس بعد مرور اكتر من 4 سنين , اتخاصمنا, و اتصالحنا, و قربنا و بعدنا
انا حابه انى اقول لصديقتى, انى بحبها, واتعلمت منها كتير, و ان يمكن فى فترة من فترات حياتى, كانت بالنسبالى ازمة حياتى, بس انا لما بفتكر الفترة دى دوقتى, بلاقى من جوايا, مسامحاها, و مبفتكرش احاسيس صعبه انا كنت بمر بيها
و دوقتى هسيبكم مع .....
.
صديقتى
الى صديقتى
اخر ما أكتب إليك ها هو
اتيه فى اخر لحظات فى عمر صداقتنا
فإن ما بيننا مهما كانت تسميته
يلفظ أنفاسه الأخيره
لن ألوم و لن أعاتب
لأننى لست أدرى من الظالم و من المظلوم
لن أقول ليتنى أعرف لم فعلت ما فعلتين
لم ضحينا بحب السنين
لن أطلب منك تبريرا
فتبريرك قد وجده قلبى
لن أطلب منك إعتذارا
لأن هذا ما يرفضه عقلى
لكنى أطلب منك إحتمالا لما هو ات
لأنه أت إذ وافقنا أم أبينا إذ إحتملنا أم ضعفنا
كل ما أريد قوله.... شكرا
أشكرك على كل لحظه قضيناها معا فقد كانت من أجمل لحظاتى
أشكرك على حبك لى فقد كان حبى متبادلا
أشكرك على تعليمى كيف تكون الصداقه و حب الغير
فقد كنا نحن الأثنتين فى مدرسه
كنا فيها المدرستان الوحيدتان
و كنا فى نفس الوقت التلميذتان النجيبتان
لكنى لست أدرى لم رسبنا فى أول إختبار لنا
و لكنى أتمنى لك أن تنجحى فى إختبارك التالى
و لكنى لن أكون وقتها أشاركك الأختبار
فأنت قد وجدت لى بديلا
فأرجو أن يكون بديلا صالحا

15 comments:

  1. انا مش عارفة ابتدى اذاى بس انشاء الله حبتدى :) اولا كلامك مظبوط جدا و حساكى فعلا قسمتى الذكريات صح يعنى المحطات بس فيه حاجة مش عارفة انا عن نفسى لما بفتكر ذكرياتى مش بحس ان الاحزان اكتر من الفراح بالعكس بحس ان افراحى و الحمد الله اكتر حتى لما بفتكر الدروب الاحزان يعنى فى ذكرياتى حساها بتيجى عشان يجى بعدها افراح يعنى لازم يعنى برده بشوفها بصورة مفرحه يلا ما علينا ده كان تعقيبى على اول جزء
    ثانيا فى المحطة التالتة او الخيره اللى احنا بنقف عندها و نبكى على الاطلال انا اظن فى فترة من فترات حيتنا ييتتحول للمحطة التانيه يعنى بيقل البكاء على الطلال تدريجيا بوصى اظن عشان حجتين يامه بيجى حاجة اشد منها فديه بتياه بسيطة و تنتقل تلقائيا لمرتبة المحطة التانيه او عشان بيمر عليها الزمن فبتتنسى او بنتنساها و سعات بنفتكرها لما نكون فى مود مش كويس
    ثالثاو عن كلامك عن صديقتك انا حسيته جدا عشان حصل مع اشخاص قريبين لى و كانت كل واحدة بتنقلى مشاعرها ففهمت الكلام ده اوى
    عاوزة اقول كلام تانى كتير بس مش عارفة ارتب افكارى يلا مستنية ردك على كلامى عشان اكيد حتقولى حاجة ترتبلى افكاى و اعرف اكتبها :)

    ReplyDelete
  2. ازاى يا أم ام بالنسبه لكلامك عن الطلال و انها بتنقل من المرتبى الرابعه للتالته , فده صحيح 100%. لأن الوقت اكيد بينسى بعض من ذكرياتنا الحلوة و المرة برضه
    و كمان مفيش حاجه هتنسكى حاجة غير لما تكون اقوى منها, بس بتعلم قى حياتك, و فوق كل ده بتزود تجربتك فى الحياة و بتبرز اقوى ما فيكى
    بت=النسبه بقى ان انتى افراحك اكتر من احزانك, فما شاء الله يا ام ان, يا رب دايما
    انما انا كان قصدى ان لما بفتكر التجارب السعيدة, دايما بتتجمع فى مخيلتى كلحظة, يعنى لو قضيت اسبوع حلو و سعيد, دايما فى لحظه هى دى الى بتعلم معاكى, انما الحزن, انا بحس ان الواحد لما بيفتكره بيفتكره كفترة على بعضها
    ده يمكن لأن الحزن دايما بيبقالوا مقدمات, و لما بيجى الواحد بتألم لفترة و بعدين يحاول انه يخرج نفسه من المود ده, و الانسان بيمر بمراحل كتيرة
    انما الفرح دايما بيجى من غير ميعاد, و الواحد لا بيحضرلوه و لا بيحاول انه يطلع من المود الحلو ده
    ولا انتى شايفه ايه؟؟؟

    ReplyDelete
  3. hey hopiz,
    I liked how u categorized el ma7atat la2n fe3lan 3andek 7a2
    laken ana f weghet nazari el motawad3a w men 7'ebreti el so3'ayara en kolo bey3ai
    7ata el ma7ata el rab3a eli fiha el wa7ed beykoon 7al highway west el 3arabyat 7at3adi laken 7ata7'od wa2taha
    kaman el wa7ed lama beye7salo catastroph beya3taked en keda 7'alas w en dih aswa2 7aga momken te7salo laken law wa2af shewaya w 3amal zoom out 3ala his situation w ta7ala bel iman wa el tafkir el 3amik 7ayla2i en heya dih el 7aya curve tale3 w curve nazel
    el mohem ne2dar ne7'ali el curve fel 3ali 3ala tool....
    ur cousin elli enti 3rfaha taba3an lol

    ReplyDelete
  4. ازيك يا موها عامله ايه.اوبس... قصدى يا قريبتى الى انا عارفاها طبعا
    الاول بشكرك على تعليقك الحلو ده
    و طبعا انتى عندك حق, ان كلوا بيعدى, سوا بالوقت او بالعلاج , ان الواحد يعالج نفسه, سواء بقى انوا يبقى صريح مع نفسه, و يتحلى بالايمان. بس انا اعتقد ان اقوى حاجه تعالج الانسان فى الحاله دى انوا يواجه الموقف, يعنى لو مثلا الموقف ده مع انسان, لازم ترجعيلوا و تعاتبيته حتى لو ده مش هيبقالوا معنى . او مش هيصلح وضع. انما هيريح العقل الباطن , هيحل العقده الى جوه قوى دى.... علم نفس بقى

    ReplyDelete
  5. akeed en el mowagha heya el hal bezat lama tekoon el mochkela ma3a ensan
    laken an 2ktashaft bardo en moch kol ensan yestahel enek tewagheeh
    ya3ni fih nas lama tez3ali menha w te3atbiha tekoon 2d el kalam w t7awel tesala7 el wad3
    ama nas tanya walla yefre2 ma3aha
    enti 7atez3ali w t3atbi w homa walla 3andohom dam w 3alla fekra ana 3ada 3alaya nas keda that's why I blame only those I'm sure WHO will care about how I see them 3'er keda matet3abish nafsek
    ana arebtek men be3eed w akeed 3arfani bardo

    ReplyDelete
  6. بصى يا هوبا انا مكنش قصدى على كمية الفراح و الاخزان انا كان قصدى لمل باجى افتكر الافراح او الاحزان باعض افكر فى الافراح اكتر يعنى ذى ما انت بتقولى بس عكسك فاهمانى يعنى بعدى الاحزان سريعا لكن الحاجات الحلوة باعد افكر فيها كتير ده اللى بيحصل معايا capitoo :)

    ReplyDelete
  7. و الله يا ايمى. هو على حسب موود الواحد
    و شخصيته بلا شك طبعا انتى شخصيه فرحه و متفائله لدرجه عاليه جدا
    بس عارفه انا حتى فى احزانى , ببقى مستمتعة بالحزن ده, و المود الكئيب ده, يمكن لنى بيبقى عندى يقين انها فترة و اكيد هتعدى
    و عشان كمان الالام و الحزن على رأى الى قالها هما اتون المشاعر, و الحزن بيحطك فى حاله غريبه و نادرة من الصفاء الذهنى

    ReplyDelete
  8. طبعا يا هبه يمكن انا الوحيد اللى عارف مين صديقتك دى ده لو طلع تخمينى صح يعنى ؟؟!!
    وانتى عارفه ان ليها معايا موقف فى حياتى ويمكن على اساساه اتغيرت حاجات كتير
    كله بيروح ويتنسى
    المهم انك تكونى لقيتى فعلا البديل الصالح

    ReplyDelete
  9. ما هى الحياة كده, ماشى فى طريق بتقابل ناس, و تتعرف على ناس, تصاحب ناس و تخسر ناس

    ReplyDelete
  10. طبعا وجدتى البديل الصالح ..امال انا بعمل ايه فى المنطقة
    :) انا بهزر معاكى
    بقالى يومين مش عارفة اعلق و كل ماجى اكتب حاجة الاقيها كئيبة و حزينة
    بس يظهر انى بحب الحزن لأنه مش عايز يفارقنى بقالو حبة حلوين
    بالنسبة للمحطات منقدرش نحصرهم فى اربع محطات او اكتر لنهم اكتر من كدة ..انا مقدرش اقولهم برضه و لا اى حد يقدر يحصرهم لأننا كبشر بنعيش حياه مختلفة عن بعض و مش كلنا بنركب نفس القطر و لا كلنا بنعدى على نفس المحطات
    ححكيلك على حاجة ...مريت باكبر نكبة فى حياتى "و يمكن متكونش اكبر و لا حاجة الله اعلم " بس كانت فى المحطة التالتة بكيت و ضعفت و حزنت و ما زلت لما بفتكرها رغم انى اصلا مش بنساها بيجيلى نفس الحزن و نفس الدموع ..بس الغريب انها هى نفس النقطة اللى كانت مصدر قوة و تغيير لأحسن .....عارفة ليه؟؟
    لأن فيه عنصر لو دخل كل شئ بيهون سعاتها.عنصر اسمه سعادة الرضا
    مش كل حاجة حتحصلنا حنحبها و لكن لو عملنا كل اللى فى ايدينا و بعد كدة رضينا حنرتاح
    و ساعتها عمرنا محندخل فى اطار المحطة الرابعة أبدا
    بالنسبة للصديقة الى بتتكلمى عنها انا واثقة انها انسانة كبيرة قوى بس حصل خلاف ...لأن الطيب مبيصحبش الا الطيب
    و اخيرا دايما بيراودنى السؤال ..لو عامل كل انسان اخيه على ان هذا آخر يوم يراه بالدنا ...ترى كيف يمكن ان تكون الحياه؟؟؟؟؟ّّ
    !!!!
    و
    السلام عليكم

    ReplyDelete
  11. هبة كلامك مظبوط عن المحطات
    بس فعلا زى ما بتقولى ما تندميش ابدا انك عرفتى حد معين لانك بتستفيدى من كل حد بتعرفيه
    ومين عارف يمكن انت وصاحبتك ترجعوا تانى اصحاب بس مش حيبقى ابدا زى الأول

    ReplyDelete
  12. اولا جميل قولى البوست ده يا هبه
    ثانيا ميرسى على الكومنت وده شرف ليا انا كمان بس بجد البلوج بتاعك يستاهل انى اضيفه
    ثالثا واضح ان الصداقة فى الزمن ده بقت اكتر من نادرة فعلا مافيش حد بيكمل للاخر بس برضه علشان نكون واقعيين لازم نتنازل وما نحطش امال عريضة عشان منتعبش فى الاخر
    وشكرا

    ReplyDelete
  13. 3omr ma el sadaka kanet mar7ala ba7es enha 7ayah we lama btentehy 7ayah kamla btentehy we tebda2y 3'ariba fi donya gdida

    ReplyDelete
  14. " كلوا بيعدى, سوا بالوقت او بالعلا"

    ياريت كله كان بيعدي بالوقت :( جروح الجسد بس اللي بتروح بالوقت وحتى مش كلها,, لكن الذكريات المؤلمة او الفشل المفاجئ او المتكرر او الاحباط العميق المؤلم , الاحباط لما يتمكن من انسان ويسكنه ويحتله ... لا فيه كتير مبيروحش بالوقت,, مكانش بقى فيه قسم طب نفسي في علم الطب :(

    ReplyDelete