فى عز فرحتى ببقى خايفه عليك
اول ما أشوفك ببقى خايفة عليك
ولما بعدت عن عينى كنت خايفة عليك
و انا خارجة من حاره مع أصحابى
بنضحك و نسلم لبعض الأبتسامه
لقيت لمه لقيت هوجه
لقيت الموت فى انتظاى
وقفت فى مكانى و الكل وقف
لحظتها لقيتنى من جوه ساكته
بفكر, ايه الى ممكن يجرى
لقيت اصحابى بيمشوا ناحية اللم
فى عيونهم خوف و قلق ولهفه
ابتديت أمشى و لما جريوا جريت
بصيت فى الوشوش لمحتك من بعيد
بتجرى ناحيتنا عايز تطمنا
عمرى ما شوفتك متاخد ذى لحظتها
اول ما شوفتك خفت
مع انك جاى بتقول اهدوا
و مع ذلك قلبى ماهداش
أول ما شوفت ملامحك
الخوف دبدب فى قلبى
كان وشك بلون الدم
كل الى جه فى بالى
انك مش بخير و بتدارى
و لما اطمينا ان الموت ما كانش لينا
دخلت أوضتى
و على مخدتى و ابتديت أعيط
ٍسألونى مالك؟
جاوبت و قلت خايفة
و من ساعتها و انا بفكركنت خايفه ليه؟
و ايه كان فازعنى
بس بينى وبين نفسى و من غير كدب ولا تزييف
انا عارفة
انى كنت خايفة عليك
ممممم ,, طيب , عندي كتير اقوله
ReplyDeleteـ وحشتني جدا كتاباتك ومتتاخريش كده تاني :)
ـ الخاطرة دي تحفة بجد وتعبيرك فيها عن الخوف عامة وفكرتك عن الحب انه مرتبط جدا بالخوف... سواء الخوف من والخوف على,
ولو ان الخوف هو اخر حاجة عايزة اتكلم عنها دلوقتي... لاني خايفة بس ان شاء الله يحصل خير....انا مش عارفة اكتب اعذريني لاني بجد في موقف دقيق, ادعيلي كتير ربنا يوفقني واعدي على خير من المشكلة دي...
خير يا ايه ان شاء الله
ReplyDeleteان شاء الله كله هيبقى تمام, و حاولى متخافيش يا ايه
صحيح الخوف ده شعور طبيعى
س متخليهوش يتغلب عليكى
مستنياكى تطمنينى
:)
كلماتك جد رقيقة وإحساس جميل
ReplyDeleteبس أنا مش بحب الخوف
ومتعودتش عليه
عمرى فى حياتى مافكرت إنى أخاف
يمكن يكون لإنى مينفعش أخاف لإنى المفروض إنى أبعث السلام فى نفوس من حولى
بحكم إنى أكبر أخواتى مثلا
مش عارف
بس يجوز
بس كنت دايما أول ما بحس بإنى هضعف بلجأ لربنا وكان دايما بينصفنى ويثبتنى
تحياتى ليكى على كلماتك الرقيقة
طبعا يا منسى مفيش حد بيحب يخاف و لا يتمناه
ReplyDeleteبس دى فطرة فى الانسان
غصبن عن لازم يخاف
و عل رأى لطيفه
"الخوف هو شعور انسانى"
يمكن ما بنحبوش عشان بيحسسنا قد ايه احنا ضعاف
و برضة طبيعى اننا نقاوم احساسنا بالخوف
لان برضه دى لازمة من لوازم الحياه
لاننا لو ما قاومنهاهوش
هيقتلنا و يقضى علينا
و شكرا على رايك الجميل