Sunday, September 7, 2008

مش محتاجاك البلد- مرثية فى ضحايا الانهيار الصخرى فى منطقة الدويقة



اخرج بره الحدود
و اياك تعود
تعود لمين, ولأيه, وفين
مش محتاجاك
ولا الأماكن , ولا البيوت
مالكش فيها مكان
و عمرك ما هتحس بأمان
****
داخل أسوارها متلقيش
الا الخراب, وموت و جوع
و أكيد أكيد, مصيرك فيها تموت
موته شنيعة , كلها ذل وخنوع
****
يا قطر تدهسك عجلاته
يا فى عبارة
و بحر تاكلك سمكاته
يا صخرة من فووووق جبل
تقع عليك تدهسك
و انت نايم ناوى تصوم
وليه من النوم تقوم؟
حقك؟ عمره ما كان حقك
ولا فى يوم هيكون
****
و مش بعيد تطلع غلطان
و أكيد السبب انك غلبان
فقير مسكين حيران
لا ليك ظهر ولا بطن ولا حتى مصران
كل الى ليك وحيلتك
قفا....
يـــــــا دووووب ,عليه تنضرب
****
وبدل ما فى البلد دى تعيش
هتحط ال..... فى بقك
و متخليش
ولا ذرة تراب ولا طين
غير ماتسفها يا مسكين
****
و عجبى
عجبى عليكى يا بلد
الفقير فيكى غلبان
سايبه كباراتك
يلطشوا فيه يمين و شمال
****

2 comments:

  1. اخرج بره البلد مش محتجاك...
    قشعريرة باردة.... انا معرفتش اكمل القصيدة بصراحة :(:(:( ربنا يصلح الحال...

    ReplyDelete
  2. الموضوع ده ممكن اتكلم فيه سنين و سنين
    و من غير ما كلامى يخلص
    و من غير ما نوصل لحل

    ReplyDelete