Tuesday, September 9, 2008

تساؤلات حول قضية مقتل سوزان تميم

فى حاجة مش مضبوطة فى وقائع القضية المعلنة فى الصحف خاصه بمحسن السكرى المتهم الأول فى قضية مقتل سوزان تميم
.
النقطة الأولى: لو محسن السكرى ده فدر قديم فى الهيئة العسكرية المصرية, او حتى حراسات خاصة, او على أقل تقدير رئيس الأمن فى جزء من شركة كبيرة كشركة طلعت مصطفى, ازاى يبقى بيتعامل بمنتهى الهبالة و الرعونة و الغباوة دى
- يشيل مليون ونصف دولار فى فرن البوتوجاز فى بيته الخاص, وال ايه شال خرطوم الغاز عشان اخته ساعات بتيجى البيت وممكن تولع البوتوجاز
ده لو حرامى غسيل اول مرة يسرق, مش هيعمل كده, فن البوتوجاز!!!!!
طب ما هى ممكن اخته توصل الخرطوم وتشغل البوتوجاز
طب ماهى اخته ممكن تفتح الفرن و تلاقى الفلوس وتاخدها و متولعش الفرن
طب هو البوليس عندنا غبى للدرجة دى عشان ميدورش جوه البوتاجاز
طب هو كفرد امن حتى لو خاص, معندوش بدائل و طرق غير كده, حتى لو بحكم مقاربته لرجال الاعمال
بنك فى سويسرا, يحطهم بأسم حد تانى, يشيلهم فى مكان ان شاء الله تحت سحابة فى الصحرا الواسعة
************
النقطة التانية: وهو داخل على المرحومة عشان يخلص عليها, معملش دراسة للموقع الى هى ساكنه فيه؟ مش اجل الموضوع كذا مره عشان الامر مش سهل, واحتياطات امن و بتاع, طب ايه الى حصل؟؟؟ معقول ماشفش الكاميرات المتعلقة فى كل دور, ده حتى انا اكيد هتوقع ان مبنى فى دبى و كبير أكيد هيكون فيه احتياطات امن و كاميرات
طب يقتل الوليه اول ما تفتح الباب, فتخربشة و يخر دم على التيشيرت, طب ما يستنى لما تدخل جوه
طب خر ده و غير هدومة, يقوم يرمية فى باسكيت فى دور من الدوار, يعنى اول زبال هيفتح الباسكت, هيلاقيهم, مش يشيلهم و يحرقهم ولا يقطعهم ولا يتحفظ بيهم ويغسلهم
************
النقطة الثالثة:
ان وهو خارج من المبنى الكاميرا الى على البوابة تتبعته فى الشارع لححد ما دخل فندق الواحى الى قصاد المبنى السكنى, و مادام الكاميرا تتبعته, يعنى حد حركها و فى حد بيتفرج, و كمان شاكك فيه, طب سابه ليه من الأول يسيب المبنى؟؟؟
.
انا خلصت خلاص, بس حاسه ان فى حاجة غلط

9 comments:

  1. بجد والله عايز عارف فعلاً

    هو ليه كل الناس مهتمة اوي كدة بقضية بسوزان تميم .. كل كل الناس بجد مهتمين .. ماتتحرق سوزان على هشام على السكري على اللي خلفوا اللي جاب ميتين أهليهم .. والله ماقصد اضايقك .. بس نفسي اعرف بجد ليه الناس مهتمة للدرجة بموضوعها .. وواخدين الموضوع على صدرهم اوي .. مجرد سؤال فعلا نفسي اعرف اجابته

    ReplyDelete
  2. السلام عليكم ورحمة الله وبركاته

    دى اول زيارة ليا لمدونتك الجميلة دى

    جزاكى الله خيرا على المواضيع المهمة دى

    انا سعيدة بزيارتى لمدونتك بجد

    تقبلى مرورى

    ReplyDelete
  3. طارق:
    هو الاهتمام مش بشخصية سوان نفسها , لانها كفنانة كانت غير مشهورة بالمرة
    ولا بحادث مقتلها فى حد ذاته, بدليل ان قبل ما هشام طلعت مصطفى يظهر فى الصورة, الموضوع ماكانش واخد اى ي من تفكير المصريين
    انما اسباب الاهتمام بتتلخص فى عناصر تانية
    - فساد رجال الأعمال المصريين
    -طرق مراقبتهم و محاسبتهم
    -فساد اعضاء رجال الشرطة و امن الدولة
    -تصفية رجال الدولة
    يعنى اسباب اهتمامى بالموضوع اسباب سياسية و شعورى بفساد مستشرى فى بلدنا
    مش ان مين قتل مين
    و اخيرا لو ان هشام طلعت كان بيتحاكم فى دولة الأمارات, ماكنش اخد الحيز نفسه من تفكيرنا, لانه بوجوده هنا فى سجون مصرية , يوجد شعور قوى بان الفساد سيدتخل بطريقة ما فى القضية
    و شكرا على مرورك الكريم

    ReplyDelete
  4. اختكم فى الله
    اناا سعد على مرورك و على تعليقك واتمنى انك تتابعي المدونة و تكون دايما عجباكى

    ReplyDelete
  5. شكراً على توضيحك بجد
    :)

    ReplyDelete
  6. و انا اشكرك يا طاق بجد على مرورك وعلى تعليقك جدا

    ReplyDelete
  7. وحشتينييييييي وحبيت اقولك كل سنة وانت طيبة, ملش متأخرة بس والله ظروف

    عفوا على الخروج عن الموضوع :)

    ReplyDelete
  8. و انت طيبة يا ايه
    بجد انتى وحشتينى قوى وكل ركن فى المدونة مفتقدك
    بس انا زعلانة منك
    روحتى فين يا بنتى؟
    و ان شاء الله تكون الظروف خير ان شاء الله
    و انتى مش سايبة اى وسيلة اتصال بيكى
    طمنينى عليكى وان شاء الله تكون الايام المفترجة دى فرجة لاى ظرف ليكى

    ReplyDelete
  9. السلام عليكي ورحمة الله .. انا فعلا مستغربه من الحاجات الي ذكرتيهم معقوله هوا غبي للدرجه دي؟؟ولا السالفه فيها حاجه تانيه وانا متاكده من هذا الشي... وكما قلتي .. الفساد (( سوف يتدخل بهذه القضيه)) وشكرا

    ReplyDelete