أحذروا الفتنة يا عرب

.

أحذروا الفتنة يا عرب

فليس هذا أوانها

تجنبوا الهوه يا عرب

فانتم ترونها

هيا أتحدوا يا عرب

بأتجاة الحرية

غزة تحت النار... لليوم الثالث على التوالى

 

التبرع لأخواننا الفلسطنين تحت خط النار

لدى الهلال الأحمر المصرى و الذى يتعهد بأيصال المعونات للهلال الاحمر الفلسطينى و بتاخد وصل بالى بتتبرع به لتتأكد من وصوله

و فى كمان نقابه الأطباء , لجنه الاغاثه الانسانية

و دى مقرها فى الأسكندرية

2 ش مصطفى كامل بجوار كوبرى كليوباترا

ت: 4255250

ورقم حساب : لجنه الأغاثه الانسانية

حساب رقم 914/22/43

بنك مصر فرع ابو العباس

و دول أضمن الجهات لضمان وصول المعونات

كمان التبرع بالدم و اكيد موجود فى الهلال الأحمر

..............................

أتمنى يا جماعه نفعل ما هو اكثر من الدعاء

نحن ندعى لثقتنا فى الله 

و لكن لننقذ اهالينا فى فلسطين الذين لا يجدون الغاز لطهو طعامهم

فأن لم نكن نملك قرارتنا السياسية

ولا نملك الضغط على حكوماتنا و لا ادارة قراراتها

فلنملك حقنا الطبيعى فى المساهمه فى التخفيف من وطأه الحرب

فالحياه هناك عزيزة و غاليه

فأصمدى يا فلسطين

.................................

و ارجو الدخول على موقع

www.amlalommah.net

للتعريف على كيفيه مسانده القضية الفلسطينية

لك الله يا غزة

رحمــــــــــــــــــــــــاك يا رب
رحماك قبل عدلك
فبعدلك نهايتنا محتومة و مصيرنا بشع
أما فبرحمتك تغثنا و ترحمنا و تنقذنا من مستنقع
الحرب و الظلم و الجهل و العداوة التى نغوص فيها
.............................................
اليوم
27-12-2008
أغارت أسرائيل الغاشمة على غزة المسكينه بقذف صاروخى
و القتلى حتى الأن 220 قتيل و 700 جريح
نحسبهم عند الله شهداء
الكلام كثير و المشاعر اكثر
.............................................
و كأن العام المشؤم 2008 لا يرضى ان ينقضى بدون الام
حتى وهو يلتقط انفاسه الأخيرة لا يريد ان يترك لنا نفسنا الاخير
يريد اغراقنا معه فى وادى النسيان
.............................................
رحماك يا ربى....فالموت و الظلم و الحرب يحوطون بى من كل جانب
.............................................
أما انت... فلك الله يا غزة

التدوينه البيضاء

صوتى ضد حجب المدونات التونسية
فالحجب ليس هو الحل

لك وحدك

لقد أفقدتنى عفه مشاعرى
و كنت أول زائر لقلبى
فأخذت الأحاسيس الفياضة
و الحب الأول
****
لم يلحظ القلب سلطانك عليه
و أنتبه فجأه لوجودك به
ووقف خلفك محميا بك ليكتشف نفسه
و يدعك تبعثر خباياه عله يفهم نفسه و يصالحها
*****
معك, أيقن قلبى انه قادر على الحب و الأخلاص لحبيبه مدى الدهر
و عرف إنك مبعثه من مواته
زارع به الأمل و الحياه
و اصبح يفكر العقل فيك قبل ان يفكر فى ذاته
فأنت الأولى, و أولى منه اليه
مصلحتك تسبق مصلحته
وسعادتك هى سعادة الكون
****
و عندما أيقن بعدم وجود تلك المشاعر لديك له
أختفت الغيرة و بقى الوله و الحب
و تركك قلبى تدخل قلوب اخريات
****
غلق بابه, ووضع مفاتيحة فى جيبك دون أن تدرى
علك يوما تجده صدفه
فتعلم ان قلبا قد أختارك حبه الأول و الوحيد
فأنت وحدك صاحب الحق بدخوله
****
و ليبقى قلبى راهب فى محرابك
فلك غيرى أحباء
و لكنى لك وحدك

أعذرينى يا أمى

هل فعلا اشتاق لبلدى؟ أم انى اشتاق الى نفسى؟؟؟

بل انا اشتاق لبلدى التى طالما تخيلتها و تمنيتها بخيالى فى صغرى

بلدى التى علمونا حبها فى كتب المدرسة و احتفالات النصر و من خلال تضحيات الأخرين و تعلقهم بها الى الموت

بلدى التى لم يقدر ابى على بعادها اكثر من بضع شهور, عندما تغرب فى بلاد الثلج من أجل شهاده عليا

بلدى التى يقشعر جلدى عند سماع أسمها (مصر) , ولا اجد تفسير لهذا الحب الجارف تجاهها سوى وراثته من حب الأجداد و دمائهم التى تسرى بعروقى, تحيينى و تغذى فؤادى بحبها و عشقها

بلادى

ليس لك ذنب فى حالك التى وصلتى اليه الأن, انهم أبنائك العاقيين, الراغبين فى محو حبك من القلوب, و أسمك الطيب من الألسنه

فعندما يكون الأبن عاق, ذلك لا يعنى عقوق الكل ولا سوء الأم

و لكنى يا بلدى لا أستطيع التأقلم مع أبنائك العاقيين

فأعذرينى يا أمى, فأنى أعشقك ولا أستطيع العيش فيكى

عينيه عمرى

يا من أرى فى عينيه عمرى

الماضى منه والأتى

يا من على يديه سال دمعى

انهارا على وساداتى

و جارح القلب جرح يدمى

الى أن لفظت اخر انفاسى

فأه من حبك و ألف أه

يا حبيب العمر القاسى

واحد صحفى ضرب بوش بالجزمة.... أى و النعمة حصلت. هاهاهاهاها

للتاريخ و الذكرى

و الأيام بيننا, و هنشوف تداعيات الموقف ده ايه
و الراجل بعد ما رمى الى فى نفسه.... قصدى قال الى فى نفسه
محطش منطق
و كأنه عارف مصيره
و كانت اخــــــــــــر جزمة يرميها فى حياته
و العوض على الله

..............................................

هو: منتظر الزيدى, مراسل صحفى عراقى من قناه البغدادية و بيقولوا انه اتخطف ايام الأحتلال

بس تحس انه و هو بيرمى الجزمه مغلول بجد, شايل جواه غل كل عربى تجاه بوش و السياسه الأمريكية العنصرية

و بكده يبقى بوش اول رئيس دولة اضرب بالجزمة و هو فى المنصب و كمان اتشتم, قالوا يا كلب

بس شوية ملاحظات كده

المالكى ما كان واقف بجانب بوش, اشمعنى الحديث كله مصبوب على بوش لوحده؟

نفسى اعرف دوقتى رأى بوش الأب و هو شايف ابنه بيضرب بالجزمة

ايه الوضع القانونى للمراسل العراقى بعد الحادثة دى؟و قانونا ممكن يعملوا فيه حاجة؟

و حتى لو الأمريكان معملوش فيه حاجة و اعتبروة تعبير عن الرأى و هما معروف عنهم احترامهم لحرية التعبير, تفتكروا حكومتة الوطنية هتسيبوه؟؟؟

ارجو لو حد بيفهم فى القوانين الدولية يجاوبنى لو عنده اجابة

و اخيرا توقعوا شن حرب على بنجلاديش بسبب هذه الجزمة,اصلها صناع بنجلاديشية

و اصدار فتوى دينية بهدر دمه بسبب بدئه بحدف الفردة الشمال قبل اليمين و لم يسمى قبل الحدف

و الأيام بيننا

حكاية البنية

قصه نازلة على جبين بنية

.
منديل ولافف على رقبة مرمرية
.
ايشارب مغطى شعور حريرية
.
نقاب مدارى كل حته تيجى عليها عنيا

بس, مش هى دى القضية

القضية دور البنية فى الحياه و الدنيا
.
المهم عقلها و أفكارها الحياتية
.
و مش مهم شكلها و لا حتى طريقة التسمية
.
و هتفضل المشكلة هى هى
.
صراع دايم بينها و بين البشر حوالين حقوقها المنسية
.

و عجبى

تيك تاك

تيك تاك, تاك تيك
يا زرار بنلعب بيك
لا يوم قلت منيش شغال
ولا بدل النور, ولعت نار بكبريت
و عجبى

الأحلام

أطمع يا عصفور انك فى يوم تشوف باطن الأرض
و فى يوم يا دود انك تطير
كل واحد مخلوق لحاجة, منها و اليها يصير
مهما كانت امالك فوق ولا تحت, أمشى واليها سير
من حقك تحلم بأى حاجة وكل حاجة, بس اياك تغير

و عجبى

..........................................
الصورة المرفقة من تصويرى

أزازة جاز

ازازة جاز برقبة ضيقة, وحطيت راسى فيها

لا تقولى ايه السبب؟ ولا مين شاريها
لا بزق عشان أطلع؟ ولا بولع فيها
كل ما فيها انى ساكن,و ساكت وراضى بالمعيشة

و عجبى

Epitaph lost her Blog

FaceBook

We are a group of Egyptian bloggers really bothered by the blockage of the two-year-old blog "Epitaph_87" ( http://www.epitaph-87.blogspot.com/) along her gmail account (epitaph87@gmail.com), since October, 4th , 2008. She has sent you her problem and requests on Google Help Center and Blogger Support, but in vain. We wish that you'd help us retrieve that blog and account and answer the requests of our fellow bloggers, sending you from (epitaph_1987@hotmail.com), and hopefully ASAP!
Just for notice, we have published this problem on our blogs!!

Thank you!

HopiZ

جانا العيد ... اهو جانا العيد

صحيح رمضان جرى بسرعة... و صحيح هيوحشنى... بس انا فرحانة ان العيد خلاص جاى

زمان و انا صغيرة

افتكر لما كنا نتلم يوم الوقفة عند جدتى فى الصالة , و ماما و عماتى يقعدوا يعملوا الكحك و البسكوت و الحاجات تترص فى الصوانى, و احنا و ولاد عماتى نقعد نلعب حواليهم و كنا نتمنى نلف ماكينه البسكوت او ننقش الكحك,و لما نزهق كنا نطلع نلعب فى بلكونة البيت و نغنى و نفرح.
و لما يطلع الكحك و البسكوت من الفرن و هو سخن, كنا نجرى على جدتى و هى توزع علينا البسكوت, كان طعمة بيبقى حلو قووووووى و هو لسه طالع من الفرن و ريحة البيت تبقى تجنن
نروح مبسوطين. نحضر لبس العيد و الجزمة الجديدة و نحطهم فى الدولاب, و ندخل الحمام ناخد حوماية العيد و نخرج و احنا لابسين بيجامة العيد, نقعد نتفرج على التليفزيون , لحد ما ننام
كنت اصحى من النوم على صوت تكبيرة صلاه العيد
كنت بحس ان الصوت ده مش صوت عادى جاى من ناس عادية ولا حتى ناس على الارض
كنت بحسه صوت جاى من السما
و كأن السما مفتحة و خارج منها نور ربانى و صوت لونه ابيض بيكبر و يصلى , شاكر ربه, فرحان بالعيد
و كنت اصحى بدرى جدا, البس لبس العيد الجديد و الجزمة الجديدة و اطلع من اوضتى الالقى على السفرة طبق الكحك و طبق للغريبة و طبق البسكوت, ماما حطاهم من امبارح
كنا نولع التليفزيون و يبقى التليفزيون مليان فرح, اغانى العيد
و كأن العيد معناه اغانى صفاء ابو السعود
نقعد نرقص و نغنى انا و اخواتى لحد ما ننزل نتجمع مع قرايبنا, و كنا فى الغالب محضرين شنط هدومنا, لاننا كنا بنقضى العيد سوا فى المعمورة
شقه صغنتونة و جميلة كنا متعودين نقضى العيد هناك
الترابيزة علطول عليها كحك و غريبة و بسكوتات و ترمس و حلبة ولب – محنا محرومين منه طول رمضان – و نتجمع على الغدا على اكلة رنجة جميلة
بس قبل الرنجة كان فيه العيدية, بجد كانت حلوة جدا, صحيح كانت بتبقى رمزية – جنية واحد بس – بس كا ليها قيمة, كان الواحد بيطلعوا ب 12 جنيه او 15 جنية
الجنية الجديد الى بيلمع و ريحته الجميلة و مافيهوش ولا تانية, دا احنا كنا بنحتار نحطه فين علشان ما يتناش, و افتكر فى عيد مرة طلعت فى دماغى انى اعمل محفظة عشان الفلوش تفضل مفروده, و عملتها فعلا – بس كانت من ورق الالومينيوم – بس كانت احلى محفظة و احلى عيد
ركوب عجل - حاجات حلوة – نتفرج على البحر – نسمع اغانى جديدة – خالد عجاج و هشام عباس و ماكارينا – نسهر للصبح نلعب بدون كلام و كوتشينة – نشوى و نرسم بالدخان احلام – نقعد وسط الكبار نسمع كلامهم و نستمتع من غير ما ندخل فى نقاش - نتلم احنا الخمس بنات فى الاوضه و نقعد نرقص و نرغى فى كلام كتيـــــــــر –
كانت ايام حلوة قوى بجد, بفتقدها جدا الايام دى, ولما بفتكرها بحس قد ايه انى كبرت,و الايام بتغير كل حاجة
صحيح و الحمد لله لمتنا زى ما هى , بس الاماكن و العادات اتغيرت
مفتقده قوى العيدية, نفسى حد يدينى عيدية, يمكن كمان لان لسه اطفال الجيل التالت لسه صغيرين مابياخدوش عيدية , بس بكرة يكبروا ان شاء الله و اديهم عيدية
بحس بجد ان الى بيدى طعم للحياه و سبب لايجاد وسائل للترفيه و للتجمع , هما الأطفال, وجود الأطفال هما الى بيحددوا اسلوب ترفيهنا و اماكن تجمعنا
كنا أطفال... و كبرنا... و عوايدنا كبرت معانا
و منتظرين أطفال الجيل الجديد.. بفرحتهم الى هيجبوها معاهم... و عوايدنا الجديدة كمان

و كل سنة و انت بخير و صحة و سعادة و هنا و فرحة و قبول و حب و سلام و كل معنى جميل اتخلق معانا و جوانا
و اهلا اهلا بالعيد.... مرحب مرحب بالعيد

الكلب و اليمامة

كلب نايم فوق شجرة
شاف يمامة على الأرض بتلقط حب
ناداها و قلها, تيجى نتمشى سوا حبه
رفعت راسها ناحيته, و قالتله احب
نط من فوق شجرته و نزلها
شاهدها فقال: فى عيونك انا بحب
بصتله باندهاش و شهقت
ازاى تفكر كده!!!! دا انا يمامة و انت كلب

و عجبى

ستائر الموت... ستائر الحياة

بدون عيناكى و قلبك الطيب... كيف تحلو لى الحياه
و هل الحياه بدونك تسمى حياه؟
لقد أشتقت للموت و لم أعد خائفه منه, حتى ألقاكى
وراء ستار الموت... يا جدتى... انت هناك بضحكتك الصافيه
و روحك الحانيه و دعواتك المستجابه
فأدعى لى يا جدتى بقرب اللقاء
و ان لا انساك مهما بعد اللقاء

مـلكـوت ربـنــا

احـيـا فـى مـلكـوت ربـنــا

أسـيـر فـيـه و اتـأمـل

و تـعـدى سـنـيـــن عـلـيـا

و انا لسه ماشى مكمل

لا عجايبه سبحانه بتنتهى

و لا انا فى يوم بزهق وأمل

*******************
الصورة من تصوير صديقتى العزيزة, شيماء

ًًََََ

اخر نكته

اسرائيل فى مأزق
رفض كل سفراء اسرائيل العمل فى سفارتها بالقاهرة

المصرى اليوم

................................

و الله و جه اليوم الى الصهاينه هما الى رافضين يجوا عندنا
و الله دى حاجة تعل , تشل
و السفيرالحالى الله ....... بيته
و يزودله حنية قلبة , وافق انه يمد فترة اقامته فى القاهرة لمده 3 شهور لحد ما يلاقوا سفير يرضى
فعلا و الله دى اخر نكته و خلاص دكان النكت جبر خلاص
و لو عايزين رأيى هما يعلوا المرتب شوية و انا مستعده اروح امسكلهم المنصب و السفارة و السفرة و السفراجية واسفلهم التراب كمان

امتى بقى ترجعى يا مصر

رحلة للقمر

جالى حبيبى بعد طول غياب

بأيديه فاضية و قلب بغيرى دفيان

حسيت كأنى بعد رحلة للسما, و ضنا و حرمان

لقيت القمر ما بين ايدايا داب

فقعدت اعيط و انشف دمعتى بكمى

نمت, و صحيت

لقيت عينايا صابها الألتهاب

و عجبى

واحشانى يا مصر

لو كنت رئيسة مصر

اول حاجة هعملها

ارجع لرمضان طعمة

هرجع الأطفال تزين شوارعها

و هدى لكل طفل فانوس بشمعة

و هحفظهم اغانى رمضان 

و يلعبوا فى الشوارع بعد الفطار

و يغنوا

فك الكيس و ادينا بقشيش

لا نروح منجيش يا حلو

و هقعد عمو حلو فى وسطهم طول الليل

و بياع القطايق و الكنافة

هيكون فى كل حارة و شارع و حتى هيكون فى مدينتى نفسها و الرحاب و كل المدن الجديدة

هرجع الفوازير و الف ليلة و ليلة

و كل برامج الاطفال

لان الاطفال ملهومش حاجة فى رمضان

و هقعد معاهم فى الشوارع و البيوت 

اكلمهم عن رمضان وربنا

و عن رمضانا الزمان

و رمضانهم الى احلى من رمضانا

هرجع المسحراتى

و ينادى على اسامينا واحد واحد بالاسم

و نعزم عليه يطلع يتسحر معانا

و المسيحى منا, يجى يفطر معانا

المهم انه يكون مرتاح

هحط فانوس قدام كل بيت

و ضحكة على كل وش

و رضا فى كل قلب

هرجع لمة العيلة وحب الصحاب

هنزل الشوارع افطر مع الناس

و ازور كل شبر فى مصر 

و اشوفوا فى رمضان 

بيبقى متزين ازاى؟

نفطر سوا - نضحك سوا - نصلى سوا- ونحب بلدنا سوا

واحشانى يا مصر

دعاء رمضان

دعاء فى رمضان

مركزة قوى فى قرأتى للقران فى تدبرة, و فى الأدعية الى بتورد على لسان الأنبية

و هحاول اسجل فى المدونة الأدعيه الى بتمر عليا

..............................................

رب اجعلنى مقيم الصلاة و من ذريتى, ربنا وتقبل دعاء, رب اغفر لى ولوالدى وللمؤمنين يوم يقوم الحساب

سورة ابراهيم, الأيه 40 -41

يامصر حضنك رباني

يا مصر حضنك ربانى ...... فى القلب شايل همومك
و انت أميرة فى خيالى ...... و انا المتيم بنورك
يا ام التاريخ و الحضارة ...... و الفن شامل وجامع
ينقش بحب و مهارة ...... و الكل شايف وسامع
الكل عارف مأمن ...... و عارف انك عظيمة

و العدل هو بيانك ...... نعلا مادام ابتدينا

يا مهد اجمل حضارة ...... و الرحمة و الأنسانية

و الحر محتاج جسارة ......علشان يكون له قضية

بالحب نقدر نعبر ...... عن كل مبدأ و قيمة

و تعيش حياتك وتكبر ...... تعشق بلادنا الجميلة

يا حلم قلبى المنور ...... لحظة ميلاد الحقيقة

سبحان جمال الى صور...... فجرك يا مصر العتيقة

ساعة ما تفرد دراعك ...... تعرف بنفسك طريقك

الريح تحرك شراعك ......و البحر يصبح صديقك

لو كل واحد يشارك ......يعرف حدودة و دورة

نخوض جميع المعارك ...... و الحق يرجع لنورة

تعرف قدمنا الى تايهة ...... سكه صباحها الجميل
الفجر هو املنا...... يصحى فى وادى النيل
.............................
من مسرحية سكة السلامة 2000 - لمحمد صبحى
..............................

نشتهى طعم الحياة

كل ساعة تمر بينا

يطلع الصدق ينادينا

مين يرجعنا لوادينا

نشتهى طعم الحياة

.............................

من مسرحية سكة السلامة 2000 - لمحمد صبحى

..............................

اشعر بالأغتراب فى وطنى

و كأنى اسير على طريق خارج حدودة

لا استشعر الأمان بين ساحاته

لقد نسيت خيرة و حبة و امانه

اشتاق الى حضن وادينا

ليأخذنى لعالمى الذى نسيته

و لينسينى زحف الرمال لأحساسى

اين وطنى؟

ابحث عنه فى وجوه المارة

لا اجده

فى اخبارة

لا اجد الا الانين

حتى بيتى

لم يعد كذلك

لم يعد منبع الراحة و الأستقرار

عند دخولة, اخاف ان لا اخرج منه

و ان خرجت , خفت ان لا اجده عند عودتى

حتى سيرى فى الطرقات بأمان

اصبح درب من الأحلام

لا اجده غير العبوس فى كل الوجوه

و المخلفات فى كل ركن

و رائحتها كرائحة الموت

لا اجده اكثر حميمية

ولكنى لازلت ازرع

فى كل ركن داخل ذاتى

حبها

مع افتقادى لها

عود ايها الوطن لأرضك

و لنفوس ابنائك

.............................

منع قافلة كسر الحصار المصرية لمعبر رفح

مصر منعت قافلة كسر الحصار المصرية عن قطاع غزة بينما سمحت اسرائيل لسفينة كسر الحصار عن قطاع غزة بالوصول الى قطاع غزة
وماذا ننتظر بعد ذلك؟؟
لا والله انك لست بوطنى
ولا وطن اى انسان
فلا يحق ان يعيش من كان قلبة كالحجر الصوان
اصبح عدونا اكثر رحمة بنا , منا
فليرحمنا الله
ربنا لا تؤاخدنا بما فعل السفهاء منا
ربنا لا تجعلنا فتنة للقوم الظالمين ,ونجنا برحمتك من القوم الكافرين
ربنا ابعث فينا قوة تطهيرنا, و شجاعة مواجهة الظالمين, قبل ان يحل الهلاك علينا اجمعين
اقولها ولست بنادمة فلنذهب جميعا لجهنم ثمن سكوتنا

عود كبريت

عانيت...عانيت
ولما بكيت
لقيت قدامى
عود كبريت
كحته
فنور وشى
ومن الضوء لقيتى عميت
وجه فى عقل بالى
ان الخلاص
خلاص عالباب
قمت وبنور الكبريت مشيت
ومع لسعه لصباعى
قلت خلاص
الأمل ولى وداب
ومن يأسى
على الأرض اترميت
لقيتها جنبى
نايمة فى استسلام
شمعة صغيرة
قربتلها بقايا عود بينطفى
لقيتها نورت البيت

09-09-2008 يوم تاريخى

النهاردة يوم تاريخى لمدونتى الحبيبة لأن فى يوم واحد, 24 ساعة فقط
وصل عدد مشاهدى المدونة الى80 زائر مرة واحدة وتم فتح 135 صفحة من مدونتى وزانى 69 زائر جديد و 11 من القدامى الاعزاء عارفة ان الرقم ممكن يكون مش كبير بالنسبة لناس كتير بس بالنسبة لمدونتى وليا عدد وهمى بالذات اننا فى رمضان الكريم و شكر خاص لكل من مروا عليا و كل سنه وانتم طيبين
مع حبى

تساؤلات حول قضية مقتل سوزان تميم

فى حاجة مش مضبوطة فى وقائع القضية المعلنة فى الصحف خاصه بمحسن السكرى المتهم الأول فى قضية مقتل سوزان تميم
.
النقطة الأولى: لو محسن السكرى ده فدر قديم فى الهيئة العسكرية المصرية, او حتى حراسات خاصة, او على أقل تقدير رئيس الأمن فى جزء من شركة كبيرة كشركة طلعت مصطفى, ازاى يبقى بيتعامل بمنتهى الهبالة و الرعونة و الغباوة دى
- يشيل مليون ونصف دولار فى فرن البوتوجاز فى بيته الخاص, وال ايه شال خرطوم الغاز عشان اخته ساعات بتيجى البيت وممكن تولع البوتوجاز
ده لو حرامى غسيل اول مرة يسرق, مش هيعمل كده, فن البوتوجاز!!!!!
طب ما هى ممكن اخته توصل الخرطوم وتشغل البوتوجاز
طب ماهى اخته ممكن تفتح الفرن و تلاقى الفلوس وتاخدها و متولعش الفرن
طب هو البوليس عندنا غبى للدرجة دى عشان ميدورش جوه البوتاجاز
طب هو كفرد امن حتى لو خاص, معندوش بدائل و طرق غير كده, حتى لو بحكم مقاربته لرجال الاعمال
بنك فى سويسرا, يحطهم بأسم حد تانى, يشيلهم فى مكان ان شاء الله تحت سحابة فى الصحرا الواسعة

************

النقطة التانية: وهو داخل على المرحومة عشان يخلص عليها, معملش دراسة للموقع الى هى ساكنه فيه؟ مش اجل الموضوع كذا مره عشان الامر مش سهل, واحتياطات امن و بتاع, طب ايه الى حصل؟؟؟ معقول ماشفش الكاميرات المتعلقة فى كل دور, ده حتى انا اكيد هتوقع ان مبنى فى دبى و كبير أكيد هيكون فيه احتياطات امن و كاميرات
طب يقتل الوليه اول ما تفتح الباب, فتخربشة و يخر دم على التيشيرت, طب ما يستنى لما تدخل جوه
طب خر ده و غير هدومة, يقوم يرمية فى باسكيت فى دور من الدوار, يعنى اول زبال هيفتح الباسكت, هيلاقيهم, مش يشيلهم و يحرقهم ولا يقطعهم ولا يتحفظ بيهم ويغسلهم

************

النقطة الثالثة:
ان وهو خارج من المبنى الكاميرا الى على البوابة تتبعته فى الشارع لححد ما دخل فندق الواحى الى قصاد المبنى السكنى, و مادام الكاميرا تتبعته, يعنى حد حركها و فى حد بيتفرج, و كمان شاكك فيه, طب سابه ليه من الأول يسيب المبنى؟؟؟
.
انا خلصت خلاص, بس حاسه ان فى حاجة غلط

تعليق على اخبار حادث الدويقة

واعلن مفتى الجمهورية علي جمعة قتلى الحادث "شهداء".

ونسب بعضهم سبب الكارثة الى اعمال بناء بدات منذ اسابيع على هضبة المقطم مؤكدين انهم حذروا السلطات من مخاطرها

******************

تفتكروا لما تقولوا عليهم شهداء , ده يسكتنا ولا يريح بالنا

وتفتكروا ان المسألة محتاجة ان مفتى الجمهورية يطلع بيان بيها

كلنا متأكدين انهم ماتوا بدون وجة حق

و نتمتى ان ربنا يتقبلهم شهداء عنده

منقدرش نقول غير كده

و بالنسبة للخبر التانى

لا تعليق

طوبى

طوبى لمن عاش ها هنا

يجرع مرار كاس الوطن

يذيب به ذلا , هوانا

كى يستطعمة

.........................

من وحى بوست مينا جرجس من مدونة أفريكانو

مش محتاجاك البلد- مرثية فى ضحايا الانهيار الصخرى فى منطقة الدويقة

اخرج بره الحدود
و اياك تعود
تعود لمين, ولأيه, وفين
مش محتاجاك
ولا الأماكن , ولا البيوت
مالكش فيها مكان
و عمرك ما هتحس بأمان
****
داخل أسوارها متلقيش
الا الخراب, وموت و جوع
و أكيد أكيد, مصيرك فيها تموت
موته شنيعة , كلها ذل وخنوع
****
يا قطر تدهسك عجلاته
يا فى عبارة
و بحر تاكلك سمكاته
يا صخرة من فووووق جبل
تقع عليك تدهسك
و انت نايم ناوى تصوم
وليه من النوم تقوم؟
حقك؟ عمره ما كان حقك
ولا فى يوم هيكون
****
و مش بعيد تطلع غلطان
و أكيد السبب انك غلبان
فقير مسكين حيران
لا ليك ظهر ولا بطن ولا حتى مصران
كل الى ليك وحيلتك
قفا....
يـــــــا دووووب ,عليه تنضرب
****
وبدل ما فى البلد دى تعيش
هتحط ال..... فى بقك
و متخليش
ولا ذرة تراب ولا طين
غير ماتسفها يا مسكين
****
و عجبى
عجبى عليكى يا بلد
الفقير فيكى غلبان
سايبه كباراتك
يلطشوا فيه يمين و شمال
****

أزازة فاضية

أزازة فاضية وجذع مرمى
.
جنب خطوتى الصغيرة
.
مشيت انا و عديت
.
وهما زى ما هما

سكتى...دنيتى

بحاول اوصل
.
وماشى فى سكتى
.
يا ترى هوصل
.
ولا هتوه فى دنيتى

دفا القلب

جذورك فى الأرض ثابتة

.
وفروعك للسما طايلة

.
حواليكى الدنيا فاضية

.
لكن قلبك دفيان

طريقى

طريقى اليكى بعيد
.
صحرا ورملة
.
ممكن امشيه وحيد
.
بس اللمة احلى

***************************

الصورة من محمية العميد الطبيعية - بالكيلو 93 بالساحل الشمالى

أدفع تمن صلاتك .... تدخل الجنة حدف

احجز مجلسك من الان, فالاماكن محدودة, و الصفوف الاولى قليلة ومحدودة

ليه تصلى ورا, مادام ممكن تصلى قدام, و لو هتدفع اكتر ممكن نوقفك بدل الامام

مكانك فى الجنه انت الى بحددة بألى النهاردة هتدفعة

أستنهز الفرصة, و الحق مكان ليك فى رمضان, و معاك شهادة ضمان, لو مدخلتش الجنة, ابقى قابلنى

*****************

ترررررررررررررن تررررررررررررررن
-الو
-السلام عليكم ورحمة الله وبركاته
-وعليكم السلام
-الاستاذه هبه؟
-ايوه, مين معايا؟
-احنا جمعية.....الخيرية, حضرتك حضرتى معانا امسية قبل كده
- ايوه الى هى بتاعه أبراهيم الفقى و مصطفى حسنى
-اه, حضرتك فى أمسية جديدة للداعية ........... يوم 2 رمضان
- طب كويس, ده الى فى نادى لاجون
-لا, ده هيكون فى قاعة ميراج, هيصلى بنا التراويح و بعدين هيدينا درس
- و هيصلى فين؟ فى مسجد ميراج ولا فى مسجد برا؟
- لا جوه القاعة نفسها حضرتك, و الأمسية هتبدأ ان شاء الله الساعه 7 ونص
- طب تمام, و ادفع ازاى و لمين؟
- حضرتك, مقر الجمعية فى لوران , و الامسية مفتوحة, يعنى حضرتك ممكن يجى اى حد , و السعر, الصفوف الأولى ب35 جنية و الصفوف الخلفية ب25 جنية, و الصفوف الامامية محدودة
-طب شكـــــــــــــــــــرا

*****************

مكانك فى الصلاة, ما بقاش بهمتك ولا بانك تيجى بدرى, لاء بقى بمقدرتك المالية
ببساطة كانت ممكن تقول التذاكر ب 25 و ب 35 وبس
طبعا معروف ان الأثمان دى للندوة مش للصلاة, بس برضة هل الصلاة مفتوحة لأى حد, لاء طبعا
و ليه لاء, ممكن يجى اليوم علينا الى تبقى فيه مساجد خاصه مش للعامة, ياى أنا اصلى مع الناس البوي ستيبو خالص دول, يا مامى نيفر
بجد انا ماعنديش كلام أكثر, كان مجرد موقف و عدى عليا و قلت اسجلة عشان حسيته مهم

*****************
يالا قرب قرب, عندنا المسجد الفللى, و الدخول ب5 جنية بس يا جدعان, مش هتلاقى الناس الشعبين واقفين جمبك فى الصلاة, و الشيخ بتاعنا أخر تفتيح دماغ, بغمزة صغيرة يخلصك, و صلاتك مقبولة على ضمانتة, و كام بيبى كام بيبى كام

مرحب شهر الصوم مرحب

مرحب شهر الصوم مرحب.. لياليك عادت بأمـــــان.... بعد انتظارنا و شوقنا اليك جيــــــت يا رمضـــــــــــان

رمضان كريم..... و الله أكرم
كل عام و كل واحد فى الدنيا بخير و سعادة و صحة و هنا و رضا و حب ورحمة و مغفرة و هداية
بجد دعوة من قلبى لكل الناس
مسلم – مسيحى – مصرى – سعودى – المانى – امريكى – هندى - صينى – بحب – او قلبى مقفول من ناحيته – اعرفه – او معرفوش
يا رب كلنا نبقى فى سعادة ورضا و نحب بعضنا, ونبقى رحماء ببعض
لأن رمضان شهر الرحمة و المغفرة
و لأن اول 10 ايام فى رمضان هما ايام الرحمة
فيا ريت نبقى رحماء بنفسنا و ببعض و بكل الدنيا من حوالينا
يا ريت نرقق قلبنا, نبص للدنيا بنظارة شفافة, عشان نقدر نشوفها بنفس راضية و ببسمة على الوش, وقلب صافى
هنشوفها اجمل بكتير قوى, هنشوف حالات و مناظر ممكن فى الايام العادية متأثرش فينا
رمضان ...... ما اجملة اسم...... و ما اجملها حالة
حالة من الصفا و الحب و الراحة
حالة من الطيران بجناحين من نور وسط سحاب ابيض و سما لبنى بلون البحر
حالة من القرب من الله
حالة بحبها و بستناها كل سنة
بعوده ايامك يا رمضان ....... و الله بعودة يا شهر الرحمة و شهرى المفضل

ّّّّّّّّ*************************************************

ليا فى الشهر ده 30 دعوة و مستجابة بأذن ربى. انا متيقنه من اجابتها و الامانى الى مش هتتحقق فى الدنيا, ربى هيحققهالى فى الأخرة ان شاء
كل سنة بقعد قبل رمضان بكام يوم افكر, يا رب ايه هى اول دعوة فى اول يوم رمضان
بفرحة الصوم , و سعادة الطاعة ,اكيد اول امنية ليها منزلة خاصة
و احتار
ابتدى بايه؟؟؟ يا ترى ابتدى بفلسطين و العراق ودول المسلمين؟؟ و لا ابتدى بأصلاح حالنا كعرب و مسلمين عشان نقدر نعدل احوالنا؟؟؟ ولا بأمنية ان ربنا مايحرمنيش من عيلتى و يبعد الأحزان عننا؟؟ ولا بالدعوة لجدتى بالرحمة و المغفرة و الجنة ؟؟ و لا أكون واقعية و ادعى لنفسى ... اكيد انا اولى.... يا رب قربنى ليك يا رب..... لاء يا رب الجنة..... لا لاء يا رب الزوج الصالح و الذرية الصالحة ... ولا يمكن تكون الدعوة ان ربنا يقوينى على نفسى وعلى شيطانى

احتار و اقعد اقلبها يمين و شمال و اكتب الامانى دى و احاول ارتبهم و برضة ما أوصلش لحاجة
و اسيب الورق و التفكير و يدخل رمضان واقول اسيبها لوقت الفطار
و كل سنه بعد اذان المغرب, الاقى نفسى بروح لدعوة واحده أفتتح بيها دعوات الشهر الكريم
" يا رب أعمل فيا الى انت شايفة فى صالحى, انا مسلمة نفسى ليك"
السنه دى من غير تفكير ولا ورقة و قلم, أن شاء الله هدعى نفس الدعوة و هزود عليها جزء سمعته من الشيخ خالد الجندى امبارح

"ربى انى قد كفرت بنفسى و أمنت بك ّّّّّّّ*************************************************

رمضان.... يعنى اي رمضان
رمضان بالنسبالى يعنى حاجات كتير قوى
ذكريات من ايام الطفولة و كل سنة بتزيد
المواعيد المضبوطة, الزينة فى الشوارع, لمة العيلة حوالين سفرة فى بيت, مدفع رمضان الى بيضربة العسكرى, تحويل التليفزيون على القناة الخامسة عشان نسمع الأذان, وقفة بابا فى شباك الصالة – و اتغير بقى شباك اوضة النوم عشان العمارة الى طلعت قدامنا – عشان يسمع الاذان من المسجد الى قدامنا, صنية الكنافة و الجلاش بتاعة ماما الى بعد الأكل, كان زمان برتقال الشتا الى لازم كان يكون موجود على السفرة, اللمة فى الشارع قبل الفطار بكام ساعة حوالين الراجل و هو بيعمل الكنافة و القطايف,صلاة التراويح فى المسجد او حتى فى البيت, صورة المصحف الشريف فى كل ايد و جوة كل بيت, فانوس رمضان المنور طول الشهر,وقفة ماما فى المطبخ و انتظارنا و لهفتنا عشان ناكل كل الاكل الى بتعملهولنا بحب, طشة القطايف فى الزيت قبل الفطار بربع ساعة, النزول قبل الفطار بخمس دقايق و الشوارع فاضية مفيهاش غير ناس قليلة قوى كله بيجرى عايز يحلق اللمة فى بيته, الخشاف باللبن والسودانى, قدرة فول بتغلى على النار بليل عشان نلحق ناكل منها فى السحور, فوازير شريهان و نيللى, الف ليلة وليلة, الكاميرا الخفية, و اخيرا المسحراتى الى اختفى وماحدش اهتم بيه, كنا بنستناه عشان نسمعه و احنا بنتسحر
و عشان رمضان , انا بهدلكوا المسحراتى
و كل رمضان و انتم الى الله اقرب
أصحى يا نايم وحد الدايم.. وقول نويت بكرة ان حييت.. الشهر صايم والفجر قايم.. رمضــــــــــــــــــــــان كريــــــــــــــــــــــم
و مسحراتـــــــــــــــــــــــــى منقراتـــــــــــــــــــــــى, ماشى فى البلد جوال

مركز المؤتمرات

هرجع تانى لرفع صور من تصويرى

يمكن لأن الصيف ده كان اكتره رايح فى التصوير

ورشة عمل صيفية مع طلبة فى الكليات للتصوير الفوتوغرافى

قبلها كان فى رحلة لسيوة 

و كمان رحلة من يومين لمحمية طبيعيه فى الساحل الشمالى اسمها  محمية العميد الطبيعية

بس صور النهاردة هى تفصيلية من مركز المؤتمرات  بجوار مكتبة الأسكندرية امام المجمع النظرى- الاسكندرية - مصر

ناوية ان شاء الله ارفع كل اسبوع صورة

صور النهاردة ابيض و اسود

و فعلا التصوير من غير الوان, بيخليك تشوف حاجات عمرك ما تدقق فيها و هى الوان

اللون برضه بياخد العين

و دوقتى انا هسكت و اسيب الصور

 

اتمنى ان الصور تعجبكم, واتمنى اسمع تعليق, حتى لو نقد

قمر النهار

قمر النهار ليس بجمالك
انه باهت, تائه وسط النور
ليس بكامل, انه ناقص
ليس ببهائك ولا أشراقك
على الرغم من عدم وجود نجوم
على وحدته ليس بمثلك
وسط سماء سوداء بها بعض الزرقة
مع لالىء السماء
وسط صحراء خالية من الاضواء
تكون اللوحة ناقصه دونك
و على الرغم من انك جسم معتم بارد
الا انك مازلت قمر العشاق

قمر وجهك

وحدى, أقف وحيدا

وسط الصحراي اللانهائية

أبحث عن القمر

بين اشعة الشمس المترامية

علنى اجدة فى الظهيرة

لأجد صورتك فيه

فالقمر يذكرنى بك

و انا اشتاق اليك

و اشتياقى لك ليل نهار

ليلا, القمر بسهوله اجده

ولو من خلف شرفتى

اما نهارا, ووسط الخلاء التام

لا اتبينه, ولكنى لازلت اراك

_____________________________________________

ملحوظة: الصورة من تصويرى

ورجعت تانى لصداع التكييف

سياسه مبارك فى الشعب المصرى

جابوا الفلة و قفلوا علينا

اهو انا حاسه ان الفلة قفلت على رقبتى

هروب من الموجة الحارة , لموجة البحر الزرقا

كل ما اشوفك

بزعل كل ما اشوفك.... عشان بتأكد انك

.

مش ليا

عيناك تشعان حقد وكراهية.... لذا لن أمشى دون مراياتى

هى دى الجامعة....احم.....قصدى مصر يا هبلة..... اوووف ..... قصدى يا عبلة

اليوم 3 أغسطس 2008 ,كان يوم حلقة دراسية لاسم موضوع رسالتى لدرجة الماجستير

.................................................................

وجة كئيب اخر من الحياة

.................................................................

انت كلامك كتير

انت فاكرة نفسك مذيعة

الموضوع قتل بحثا

فكرى فى موضوع تانى احسنلك

الموضوع ده مش داخل فى خطة البحث العلمى

امال فين المرشد الأكاديمى؟؟ - انا, بس لسه عارف النهاردة الصبح

Heating ل بدل Temperature اسمها

انت جاية تحاضرينا

فين فصول البحث؟ .... هى فين؟

ايه كل الخطوط دى؟!!! هو الموضوع عن الخطوط

ايه ده؟ انتى هتقعدى تقوليلنا فى تعريفات

..................................................................

مجرد تسجيل لحظى, لا يعنى احد غيرى, اما الرد فداخلى, فلنتركه يموت رويدا رويدا

..................................................................

صور صور صور ........ ملعون ابو الصور على الفيديوهات

..................................................................

حاسه انى بتحول ببطء من شخص مدافع لبلدة لأخر يريد الهروب منها, و مش حابه التغير ده و خايفة منه

..................................................................

عذرا للكل, و لكنها جملة هربت من قلبى و نطرها لسانى براه

"انا مش بعمل موضوع لأطفال فى حضانة , عشان يبقى مليان صور, انا المفروض انى بكلم اساتذه, يعنى لو اتكلمت ساعتين نظرى, مفروض يبقوا فاهمين

.................................................................

لأول مرة النهاردة, ابقى خايفة قوى كده و انا بناقش, صوت مرعوش, عيون مدمعة, لجلة فى الكلام, فرك فى الايد بطريقة متوترة

.................................................................

احب أشكر ايمان صالح - ملاكى - لتهوينها الأمور على

و م. ريهام و م. احمد حسن, وم. هانى, لنقدهم البناء

و اشكر د. نيفين, لعقلها المتفتح و الحاضر, لمحاولتها ايجاد مخرج مفيد لظلمة النقد الى كنا فيها
و اعتذر من د. ابتسام, للجملة الى فلتت من على لسانى

و اخيرا نهلة و شيماء, لأيمانهم بى و رفعهم من روحى المعنوية

.................................................................

كرهت شعورهم بضعفى اليوم

.................................................................

انا مش زعلانة, بس متغاظة

.................................................................

حكمة اليوم: لا تقاتل فى معركة خاسرة, ولا تجادل من لا يسمع

.................................................................

اه قبل ما امشى

احب ان اذكر انه تم رفض موضوع البحث