رغائب

تبدو الحياه فى صورة رغائب مستحيلة

داما حبيبية و مستحيلة

نجيب محفوظ... حديث الصباح و المساء

28-6-2007

حدث فى مثل هذا اليوم

افتتاح مدونة انا و نفسى

لصاحبتها HopiZ

و الذى افتتحت بموضوع

مقدمة عن سبب افتتاحها للمدونة

.........................................

كنا مع المقدمة.... و اليكم بالتفاصيل

اولا: كل سنه و مدونتى شغالة

انا مبسوطة قوى انى بعد عـــــام كامل لسه متواجده على المدونة و انا كمان شغالة

ثانيا: بالمناسبة السعيدة عايزة أتكلم عن شوية حاجات ليها علاقة بالمدونة

يوم ما فتحت المدونة دى كنت خايفة جدا جدا, مش من نفسى ولا من ان محدش يدخل المدونة, لأن ده كان متحدد من يوم ما قررت انى مش عاملة المدونة دى غير ليا و نفسى, الى كنت خايفة منه انى ما كملش, و انى ازهق بسرعة و افقد الحماسة, زى ما طول عمرى بعمل

لكن الحمد لله , طول السنه دى, ماجتش عليا ولا لحظة زهق او احباط

بالعكس كنت طول الوقت متشوقة انى اكمل و ارفع شغل و دايما يجيلى افكار كتير, صحيح اغلبها ما اتنفذ, بس المهم انى شغاله

حقيقى التدوين غير فيا حاجات, حتى فى شخصيتى نفسها, حتى لو مش كتير حتى لو حاجة واحده, بس غير ,اول كلمة كتبتها فى اول موضوع على المدونة كانت ( بعد تردد كبير) الى انا بقى بعلنه على مدونتى

تستحقى ايتها المدونة العظيمة ان انحنى لعظمتك التى استطاعت ان تكسر بداخلى اسوأ ما بى و هو الخوف من الأخرين, لكى كل التحية و التقدير

كنت بقول فى مقدمة المدونة انى عملت المدونة لأنى كنت عايزة اواجه نفسى, لأنى اكتشفت انى بهرب منها ساعات, فعلا التدوين خلانى افهمنى اكتر و اكتشف فيا حاجات كتير

صحيح انى قبل التدوين كنت دايما بحاول انى افهم نفسى و منكرش انى كان ليا قعدات كتير قوى مع نفسى, بس المدونة نظمتلى افكاى و رتبتها, خلتنى اشوف الصورة اشمل و من منظور بعيد, اقدر ارجع فى اى وقت و اراجع كلامة, ما نساهوش, و على رأى ايه بتخلى الكلام صورة مجسمة مش مسطحة

كنت بقول كمان انى متوقعه ان محدش يدخل المدونة غير اتنين بس, انا و نفسى, ما اقدرش انكر طبعا انى مش حابه ان مدونتى تبقى معروفة و ان زوارى يبقوا كتير و عندى ملايين التعليقات, ابقى 60 كدابه لو قلت غير كده

هو صحيح انا تعليقاتى مش كتير يعنى اعتقد خلال السنه كلها التعليقات متجيبش 100 تعليق و طبعا نصهم رد منى لاتعليقات, و الى شافونى حوالى 3000 زائر انا منهم, بس بجد انا مبسوطة قوى بالعدد ده , انا عن نفسى ما بحبش الزحمة خالص ,و يمكن لو كنت مركزة من اول ما ابتدت المدونة انى عايزاها تبقى مشهورة-لانى من طبعى انى دايما بتوقع الاعلى من كل شئ و ده يمكن الى بيخلينى افقد حماستى بسرعة- كنت اكيد هفقد حماسى للمدونة و التدوين و ما كنتش هكتب الى انا بكتبه دوقتى

من 5 ايام كنت مع اصحابى, و كنت فرحانه جدا, و بقولهم ان كمان 5 ايام مدونتى هتكمل سنه , عمرى ما اتبهيت بحاجة كده زى المرة دى, مش عارفة ليه بعد ما خلصت كلام, حسيت انى بتكلم عن بنتى او أبنى بالضبط

اخيرا: احب انى اشكر ربنا, انى انا بكتب على المدونة, لأنها عملت فى حياتى نوع من انواع التوازن النفسى

كل سنه و انتى طيبة يا مدونتى يا حبيبتى, و برافو عليكى يا هبه انك ما فقدتيش حماسك, و عقبال يا رب 50 سنة و يا رب عقبال ما تكتبى المسرحية الى نفسك فيها, وعقبال ما تبقى كاتبة بجد

كلمة

يوم ان تفقد ايمانك فى غدك, تفقد معه حياتك ذاتها

فلاسفة -2- أفلاطون

" لن يتحسن المجتمع ما لم يحصل الفلاسفة على سلطة سياسية , او يصبح السياسيون فلاسفة

أفلاطون

الأسم: أفلاطون

تاريخ الميلاد:427 ق.م

تاريخ الوفاة:347 ق.م
النشأة: ولد باليونان فى أثينا في عائلة أرسطوقراطية

الملامح: كان رجل وسيم,ضخم الجسم, يبدو عليه الرقى و الثراء, له لحية قصيرة مهذبة بعناية

فلسفتة: كانت تعتمد على الرياضيات بشكل غير معقول, حيث انه كان يعتبرها سبيله للسلام و الأنسجام مع حقائق الكون, ولذلك كان يحتم الا يدخل اكاديميته الا من يعرف الهندسة. و قد كانت كل محاوراته مع تلامذته تتم اثناء المشى, يروحون و يجيئون ولا يجلسون ابدا, فيما بعد ستتبلور هذه الطريقة أكثر مع أرسطو, و قد أنشأ افلاطون اكاديميته الخاصه ليتعلم فيها الساسة الفلسفة, لتعم الحكمة ولا يقع الظلم, ولا يعدم أشخاص مثل سقراط - حيث اثرت فيه رؤيته لمحاكمة استاذة و وظل يدافع عنه و نشر نص محاكمته- و قد كانت عقيدة الاشكال جزء اساسى من فلسفة أفلاطون, حيث كان يؤمن بوجود عالمين, عالم عقلى و اخر مادى, و ما الاشياء التى تراها اعيننا من حولنا , الا انعاكسات لأصول هذه الأشياء فى عالم المثل, و ظل غير متقن لعالم عقلانى فيه كل شىء جميل متقن.و ان الرياضيات هى الشئ الوحيد المحكم فى العالم و ان الظلال التى تسقط ونراها تتغير من قت للأخر, اما الرياضيات فهى النافذه الوحيدة . المتاحة لنا على عالم المثاليات. و كان يرى العالم الذى عيش فيه كالكهف و ما نرا ه على جدان هذا الكهف هو ظلال الحقيقة, فقط الفلاسفة هم من يستطيعوا اختراق هذا الكهف ليروا الحقيقة

رأيه فى الفن:كان يرى ان الفنون يجب ان تخضع لتعليم البشر الحق و الخير والجمال. وان الفن يجب ان يخصص لتثقيف الشباب
رأي فى المرأه: كان يكره المأه و يشمئز منها ولا يعتبرها جديرة بالصداقة, و كان يرى ان الانشان يجب ان يطهر من ذنوبة بالرياضيات و الفلسفة , و ان لم يفعل و مات سيعود للحياه مره اخى فى صورة حيوان او امراة, و فيما بعد اطلق الأدباء لقب الحب الأفلاطونى على الحب الطاهر بين الفتى و الفتاه, بينما التعبير الأدق الحب العذرى نسبة لقبيلة عذرة العربية

رأيه في الدولة : أن الغرض من الدولة هي إسعاد الأفراد للوصول إلى الحكمة و الفضيلة والمعرفة ،و ان خير وسيلة لإعانة الأفراد

للوصول إلى تلك الغايات هي التربية ، و لهذا فالتربية هي أهم واجبات الدولة . يرى أفلاطون أن الحكومة يجب أن تكون أرستقراطية العقل مكونة من فلاسفة حكماء وعلى الأخص الفيلسوف الملك ، . و تتكون الدولة من عناصر ثلاث هي العقل ممثلة في طبقة الحكام الفلاسفة و القوة ممثلة في طبقة الشرطة و الجيش و العمل في طبقة العمال . يرى أفلاطون أيضا أن على الدولة أن تراعي مصلحة المجموع لا مصلحة الفرد و أن تكون الثروة شائعة بين الأفراد كذلك النساء و الأولاد ، و الدولة تملك الأولاد منذ ولادتهم

مؤلفاته: كتاب الجمهورية ( المدينة الفاضلة ) وهو أعظم ما سطر أفلاطون ،وهو بحث شامل متشعب الفروع و هو ملخص موجز لفلسفته كلها

كتب أفلاطون العديد من الكتب أغلبها في شكل محاورات يأخذ فيها سقراط دور الشٌخصيٌة الرٌئيسيٌة. أشهر هذه المحاورات: محاورة الفيدون وبروتاغوراس، وتعتبر من مؤلٌفاته الأولى ثمٌ كتب محاورات أخرى أهمّها محاورة الجمهوريٌة ومحاورة تياتيتوس محاورة السٌفسطائي ومحاورة بارمينيدس ومحاورة السٌياسي

من كلماته: المعرفة تذكٌر والجهل نسيان

أن نتفلسف هو أن نتدرٌب على الموت

الجسد قبر للنٌفس

لا يصلح أمر هذه الأمٌة إلاٌ إذا حكم فلاسفتها أو تفلسف حكٌامها

................................................................................

الحمل

الحمل... قد يكون خفيف كالريشة... أو ثقيل كالحديد... وقد يكون حيوان برئ.... وقد يكون برجك... أو نتوء بجسد إمرأه

المهم كيف تراه انت عيناك

فلاسفة-1- سقراط

من سلاسل الروايات الى بعشقها و تقريبا جيلنا كله اتربى عليها بمختلف اعمارنا " روايات مصرية للجيب " من منا لم يقرأ ما وراء الطبيعة ولا رجل المستحيل و روايات زهور السلسلة الوحيدة التى لا يخجل الاباء من وجودها فى المنزل, مين فينا متعلقش بأدهم صبرى ولا د. رفعت اسماعيل
انا عن نفسى قريت تقريبا فى كل السلاسل’ بس متعلقتش و ادمنت سلسلة زى ما وراء الطبيعة و كوكتيل 2000
و مع ندرة اصدارها الان, فحاولت انى اكتشف سلاسل قديمة فى الاصدار جديدة عليا, و اكتشفت ان فى سلسلة اسمها فانتازيا بطلتها عبير و فعلا ادمنتها لأنها بتقوم على فكرة عبقرية فعلا, و اللأهم من ده انها بتوصل معلومات قيمة جدا فى مجالات مختلفة من خلال حدوتة ظريفة محبكة الخيوط جدا
من يومين كنت بقرأ العدد 37 بأسم فلاسفة فى حسائى, ولأنى حاولت انى اقرأ فى الفلسفة قبل كده و مفهمتش اى حاجة و لما اخدت الفلسفة فى اولى ثانوى متعلقش فى دماغى اى معلومة ولا اى اسم غير يمكن ديكارت بتاع "انا اشك اذا انا دبوس", لا لا... هو قال انا افكر اذا انا موجود
فقلت اقراها يمكن اوصل لمفهوم الفلسفة ده, و بعد ما اقريتها يمكن برضة مفهمتش معنى الفلسفة او جوهرها قوى انما فهمت المدارس الفلسفية و ده يعتبر انجاز عظيم, فقلت بما انى فهمت شوية ممكن الخص الى قريته عشان اثبته فى دماغى, و يمكن حد يفهمه معايا
و لأول مرة اخطط فى كتاب فى حياتى , عشان ارتب افكارى
انا دورى فى هذا الموضوع ما هو الا ترتيب نسج لكلام مؤلف الكتاب و هو د. احمد خالد توفيق, مع تعديل و أضافة بعض المعلومات من قراءات مختلفةكنت اتمنى انى الخص كل الفلاسفة الى جمعهم الكتاب فى موضوع واحد , لكن فشلت, فاتمنى انى ما اكنش مملة و ان الموضوع ممكن يوضح موضوع الفلسفة لحد, زى ما وضحهولى

.......................................................................................................................

" من الافضل أن نعانى الظلم من أن نمارسه.."

سقراط

الأسم: سقراط
تاريخ الميلاد:469 ق.م
تاريخ الوفاة:399 ق.م
المدرسة: الاغريقية الكلاسيكية

الملامح : لم يكن سقراط جميلا على الإطلاق .. كان أصلع الرأس جاحظ العينين مخيف النظرات ,انفه افطس ووجهة ممتلئ ,ثيابه مهملة ,لا يمشي الا حافي القدمين , لكنه كان لطيف المعشر بحق, و له طريقة ودود تأسر القلوب

الحالة الجتماعية: متزوج من زانْثِب التي عُرف عنها حسب الروايات أنها كانت حادة الطبع ويصعب العيش معها. وقد أنجبت له ثلاث أطفال.و كانت هى السبب فى رؤيته لدور المرأه فى حياه الفيلسوف, فقد كانت تتعمد اهانته امام طلبته

مدرسته الفلسفية: انه لا يقدم إجابات, لكنه يلقى أسئلة تحفز الناس على التفكير, فلسفته هى ان على الناس أن يفكروا ولا يقبلوا المسلمات.و قد كانت لا تعنيه مواضيع الفلسفة المجردة مثل كيفية نشوء الكون و خامته الأصلية, و السبب ان الكلام لن يصل فيه لحل, و ما كان يعنيه بالفلسفة انها تتحدث عن امور اكثر تجردا, مثلا فهم الأخلاق.. فهم العدل..فهم الصدق..فهم النسيان..فهم الزمن. و كان ينادى باحترام الحكومة و سلطة القانون مهما كانت جائره أو ظالمة و أن الموت هو التحرر و الشفاء من مرض هو الحياة

مؤلفاته: لم يعرف لسقراط أية مؤلفات، وقد عُرِفت معظم المعلومات عن حياته وتعاليمه من تلاميذه المؤرخ زينفون والفيلسوف أفلاطون، بالإضافة إلى ما كتبه عنه أريسطو فانيس وأرسطو

نظرته للمرأة: أن النساء دورهن يقتصر على منع الفلاسفة من ممارسة هذا العلم, و ان على الفيلسوف أن يتزوج, فإذا كانت أمراته صالحة صار رجل سعيدا, اما لو كانت شريرة لصار فيلسوفا

نهايته: قُدّمَ سقراط للمحاكمة وُوجهت إليه تهمة إفساد الشباب والإساءة إلى التقاليد الدينية. وكان سقراط يُلمحُ إلى أن الحكام يجب أن يكونوا من أولئك الرجال الذين يعرفون كيف يحكمون، وليس بالضرورة أولئك الذين يتم انتخابهم. وقد قضت هيئة المحلَّفين بثبوت التهمة على سقراط وأصدرت حكمها عليه بإلإعدام.ولم يفكر فى الهروب او انقاذ حياته لأيمانه بان الهروب سيجعل من كل ما نادى به فى حياته هراء, و ان على الفيلسوف ان يموت وفقا لمبادئه ونفذ الحكم بكلِّ هدوء متناولاً كوبًا من سم الشوكران

من أقواله عند الموت: "كريتون ، في ذمتنا ديك لا يسكولاب . ادفع له ثمنه دون نقاش" - لايسكولاب هو اله الطب و فى حين انه كان ينهى عن اكل اللحوم- الجمله التي قالها سقراط قبل موته ، والتي تمثل التشاؤم الهادئ والساخر بأبرز معانيه ، كانت عبارة رسالة من اول رجل أعدم في التاريخ بسبب افكاره

و اخيرا انتظروا المرة القادمة أفلاطون و أرسطو

سر عنى

جات تقولى هقولك سر عنى

من الدوشة افتكرته عنى انا

قالتلى انها معجبه بيه

من اول لحظة شافته بعينها

وعلى قد ما حاولت تنساه

معرفتش تعتبره شخص عادى مر فى حياتها

و على قد قوتها الظاهره للعين

حست نفسها ضعيفة, هشه

سبع سنين, مقدوش ينسوها

حبه جواها كان عامل زى الجدر الصلب

غارز. فى جذور قلبها

و غصب عنها فروعه بتطول كل روحها

ومع شوكه, و مع كل نقطة دم ع

كانت بتسيل, مقاومتها كان بتقل

تملكه لها كان بيزيد

بقت متكتفه, شاكه فى كل حاجة حواليها

وكل ده و مش دارى

قلتلها بكل بساطه, ده مش اعجاب, ده حب

وللأسف من طرف واحد

و مش بأيديك عذابك

اقسى احساس بالحب

انك تحسى بالحرمان

عندك الكتير, لكن من غير مقابل

و مفيش بأيديك, غير انك تتعايشى

و ادعيلك , ان ربنا يعوضك بأحساس يسعدك

استغربت, لما لقيتنى فاهمة عذابها

سكت

و غيرت الموضوع

مش قلتلكوا

افتكرته سر عنى انا

أنظر حولك... فستجد الكل ينظر حولك

الإجبار و الأختيار

لا تجبر الأنسان و لا تخيره

يكفيه ما فيه من عقل محيره

صلاح جاهين

.

نلغى العقل و الأختيــــار

و يكفينـا ما فينا من إجبار

الــعـــبــده لله

قسمة عادلة

انها قسمة عادلة, فالثراء للأقوياء, و الأخلاق للضعفاء

نجيب محفوظ - حديث الصباح و المساء

2كلام بلا معنى

سأبيع نظراتى ... فلست بحاجة لأرى ما حولى

.

بوضوح ... فأنه لا يستحق المشاهدة

يوم بلا ليلة

ليلا.. ترجع الزوجة متعبة, منهكة القوى. يبادر الزوج فى التعاطف معها, و إظهار مودته. يساعدها فى خلع ملابسها و يتاكد من دخولها السرير لتنال قسطا من الراحة

يبدأ فى الربت على ظهرها كنوع من الموأساه و مشاركة الألام, و يظهر على الزوجة علامات الراحة و الأمتنان

فتبدأ يد الزوج فى العبث بجسد زوجتة و تظهر من حركات يده الرغبة الجامعة فى الزوجة,و تبدا الزوجة يظهر على ملامحها علامات الدهشة عدم التصديق, و الثقة فى ان زوجها بالتأكيد لا يقصد شئ

حتى لم يستطع الزوج كبح جماح رغبتة بها, فدفع بكتف الزوجة بأتجاهه

بعد وهلة, رجعت الزوجة بجسدها الواهن لوضعة الراهن, و أغمضت جفنيها بأعياء

استيقظ الزوج مبكرا, فوجد زوجتة بنفس وضعها الليلى, حانت منه ألتفافه نحوها و أبتسم, ثم نزل الى عمله صباحا, مر يومه عادى ما بين عمل و ضحك مع الزملاء و الزميلات, الدندنة و التفكير

و بعد أنتهاء العمل عاد الى المنزل, خلع ملابسه و تركها على طاولة الطعام فى اهمال, و دخل غرفة النوم ليجد زوجته كما تركها صباحا, نائمة بنفس وضعها الصباحى من الأجهاد, ترك الغرفة و تجول فى الشقة تاركا اياها لتنال قسطا من الراحة

رن جرس الهاتف, رد و اجرى حوارا قصيرا, و بدل ملابسة سريعا و ترك البيت

عاد الى المنزل ليلا, ليجد الزوجة مازالت نائمة

عندما رأها عاودتة رغبتة بها, حاول ايقاظها, و لكنه وجدها بلا روح

لو كنت ما اخفش

لو ربنا ما كانش خلق الخوف, ولو ماكانش فيه خوف فى الدنيا, كان كل واحد غير حاجات كتير فى حياتة, قارات كتير كانت هتتغير و قرارات اكتر ما كانتش اتاخدت, علاقات كتي كانت هتنقطع, و علاقات أكتر كانت هتتوطد, يمكن الدنيا ساعاتها ما كانتش هتبقى بنفس شكلها دوقتى, لأن حتى الخوف من ربنا و من فعل المحرمات و الذنوب هيختفى هو كمان

لوكنت ما اخفش كنت......... ياااااااااه

كنت عملت حاجات كتير و حاجات اكتر ماكنتش هعملها, كانت حياتى هتتغير و يمكن ما كنتش هبقى انا. بس الى متاكده منه , انى كنت هبقى عملت كل الى فى نفسى من غير خوف

مش شرط انجح فيه, و مش شرط ان قراراتى كلها تبقى صح و مضبوطة, لأن الحياة مش مضمونة و هى اساسا تجربة, انما كنت بقيت انا زى ما انا كنت عايزة ابقى

..................................................

لو كنت ما أخفش,كنت دخلت كلية اعلام و كان زمانى صحفية

لو كنت ما أخفش, كنت دافعت عن صداقة عمرى فى وش الى خسرونى أعز صديقة لى, دينا

لو كنت ما أخفش, كنت صممت انى عمرى ما هاكل سمك, لأنى مابحبوش

لو كنت ما أخفش, كنت قلت من زمان انى بحب التمثيل و نفسى أكون ممثلة, و مازلت

لو كنت ما أخفش, كنت اتعلمت بيانو

لو كنت ما أخفش, كنت قلت لناس كتير انى بحبهم, و انى نفسى نكون اصحاب

لو كنت ما أخفش, ماكنتش عيطت و كشيت لما شفت محمد صبحى فى ندوة فى مكتبة الاسكندرية و اكتفيت انى أبصلة من بعيد, بدل ما اتكلم معاه زى ما طول عمرى بحلم

لو كنت ما اخفش, كنت دخلت كواليس مسرحية الملك لير , و سلمت على يحيى الفخرانى

لو كنت ما اخفش, كنت قلت لشخصيات معينة فى حياتى , انى مش عايزة اتعامل معاهم, عشان ما أجبرش انى اعمالهم كويس, بدل ما اكرههم

لو كنت ما اخفش, كنت روحت بيتى بدرى, يم ما مشونا من المدرسة اجبارى فى ثانوية عامة, و فضلت قاعدة على سور المدرسة, خايفة لروح اهلى يفتكرونى مزوغة, و خايفة لحد يشوفنى, يفتكرنى مزوغة

لو كنت ما اخفش, كنت قلت لميس ماجدة مدرسةالعربى بتاعتى فى اعدادى, انى بحبها و بحترمها جدا, و انها أثرت فى قوى

لو كنت ما اخفش, كنت واجهت نفسى بموت جدتى و انى مش هشوفها تانى, بدل ما انا بهرب من الحقيقة دى

لو كنت ما اخفش, كنت غيرت مدرس الكيمياء محمود العلايلى و الفرنساوى عبده رجب, فى دروس ثانوية عامة, لأنى ما كنتش بحبهم و ما كنتش بستمتع بالدرس معاهم

..................................................................

دى كانت دفعة من مخاوفى فى حياتى, اكيد فى حاجات اكتر بكتير , بس محتاجة شوية دعبسة فى النفسية

و اعتذر لأنى مقدتش اقول كل مخاوفى

و السبب انى خايفة