Tuesday, June 24, 2008

28-6-2007


حدث فى مثل هذا اليوم
افتتاح مدونة انا و نفسى

لصاحبتها HopiZ

و الذى افتتحت بموضوع

مقدمة عن سبب افتتاحها للمدونة

.........................................

كنا مع المقدمة.... و اليكم بالتفاصيل

اولا: كل سنه و مدونتى شغالة

انا مبسوطة قوى انى بعد عـــــام كامل لسه متواجده على المدونة و انا كمان شغالة

ثانيا: بالمناسبة السعيدة عايزة أتكلم عن شوية حاجات ليها علاقة بالمدونة

يوم ما فتحت المدونة دى كنت خايفة جدا جدا, مش من نفسى ولا من ان محدش يدخل المدونة, لأن ده كان متحدد من يوم ما قررت انى مش عاملة المدونة دى غير ليا و نفسى, الى كنت خايفة منه انى ما كملش, و انى ازهق بسرعة و افقد الحماسة, زى ما طول عمرى بعمل

لكن الحمد لله , طول السنه دى, ماجتش عليا ولا لحظة زهق او احباط

بالعكس كنت طول الوقت متشوقة انى اكمل و ارفع شغل و دايما يجيلى افكار كتير, صحيح اغلبها ما اتنفذ, بس المهم انى شغاله

حقيقى التدوين غير فيا حاجات, حتى فى شخصيتى نفسها, حتى لو مش كتير حتى لو حاجة واحده, بس غير ,اول كلمة كتبتها فى اول موضوع على المدونة كانت ( بعد تردد كبير) الى انا بقى بعلنه على مدونتى

تستحقى ايتها المدونة العظيمة ان انحنى لعظمتك التى استطاعت ان تكسر بداخلى اسوأ ما بى و هو الخوف من الأخرين, لكى كل التحية و التقدير

كنت بقول فى مقدمة المدونة انى عملت المدونة لأنى كنت عايزة اواجه نفسى, لأنى اكتشفت انى بهرب منها ساعات, فعلا التدوين خلانى افهمنى اكتر و اكتشف فيا حاجات كتير

صحيح انى قبل التدوين كنت دايما بحاول انى افهم نفسى و منكرش انى كان ليا قعدات كتير قوى مع نفسى, بس المدونة نظمتلى افكاى و رتبتها, خلتنى اشوف الصورة اشمل و من منظور بعيد, اقدر ارجع فى اى وقت و اراجع كلامة, ما نساهوش, و على رأى ايه بتخلى الكلام صورة مجسمة مش مسطحة

كنت بقول كمان انى متوقعه ان محدش يدخل المدونة غير اتنين بس, انا و نفسى, ما اقدرش انكر طبعا انى مش حابه ان مدونتى تبقى معروفة و ان زوارى يبقوا كتير و عندى ملايين التعليقات, ابقى 60 كدابه لو قلت غير كده

هو صحيح انا تعليقاتى مش كتير يعنى اعتقد خلال السنه كلها التعليقات متجيبش 100 تعليق و طبعا نصهم رد منى لاتعليقات, و الى شافونى حوالى 3000 زائر انا منهم, بس بجد انا مبسوطة قوى بالعدد ده , انا عن نفسى ما بحبش الزحمة خالص ,و يمكن لو كنت مركزة من اول ما ابتدت المدونة انى عايزاها تبقى مشهورة-لانى من طبعى انى دايما بتوقع الاعلى من كل شئ و ده يمكن الى بيخلينى افقد حماستى بسرعة- كنت اكيد هفقد حماسى للمدونة و التدوين و ما كنتش هكتب الى انا بكتبه دوقتى

من 5 ايام كنت مع اصحابى, و كنت فرحانه جدا, و بقولهم ان كمان 5 ايام مدونتى هتكمل سنه , عمرى ما اتبهيت بحاجة كده زى المرة دى, مش عارفة ليه بعد ما خلصت كلام, حسيت انى بتكلم عن بنتى او أبنى بالضبط

اخيرا: احب انى اشكر ربنا, انى انا بكتب على المدونة, لأنها عملت فى حياتى نوع من انواع التوازن النفسى



كل سنه و انتى طيبة يا مدونتى يا حبيبتى, و برافو عليكى يا هبه انك ما فقدتيش حماسك, و عقبال يا رب 50 سنة و يا رب عقبال ما تكتبى المسرحية الى نفسك فيها, وعقبال ما تبقى كاتبة بجد




9 comments:

  1. بجد جميل اوي ان الواحد يحس ان فعلا حاجات اتغيرت فيه بعمل حاجات معينة يعني تحسي ان تعبك جاب فايده وربنا يديكي طولة العمر وطولة التدوين وتبقي مهندسة ومدونة ناجحه رغم ان التدوين مش مهنة وعلي فكرة المعمار مش مهنة بنات برده اخوكي معماري برده ففكري ف حاجه تالته
    ههههههههههههههههه
    اتمني لو استفاد منك خصوصا اني لسه في مرحلة التكوين وبرده بعملها لنفسي الي ان تنجح حبيت اكتبلك لما لقيتك نفس المهنة ونفس الشعار اللي ف الاول وخالص تقديري واعتزازي

    ReplyDelete
  2. كل سنة وانت طيبـــــــــــــــة
    انا متحمسة جدااااااااااااا انا اول واحدة اباركلك :)

    ReplyDelete
  3. حجزت مكان :),,, اتكلم براحتي بقى... اولا انا مبسوطة انك مبسوطة ثانيا عقبالي ثالثا عقبال مليون سنة رابعا عقبال ما تعيشي وتشوفيها منشورة خامسا عقبال ما تحققي انجاز كبير اوي يجبرك تكتبي مذكراتك في كتاب :)....

    ReplyDelete
  4. كل سنة وانتى طيبة يا هبة وعقبال لما تحتفلى بالسنة المائة للمدونة
    HAPPY BIRTHDAY FOR UR BLOG Princess Heba :-)

    ReplyDelete
  5. اولا احب اشكركم كلكم على المشاعر الحلوة دى و بجد انا بعتز بردودكم قوى
    ...................................
    امجد الزميل
    هو فعلا التدوين مش مهنة, انا بعتبره هواية و متنفس نفسى, علاج يعنى
    بس معلش انا مش معاك فى نقطة ان العمارة مش مهن بنات. ازاى بقى؟؟
    انا عن نفسى بشتغل, صحيح فى منه التدريس , بس بشتغل برضه و كل اصحابى بيشتغلوا فى العمارة فى مكاتب و كمان فى منهم بيشتغلوا فى مواقع الى بيشتغل فى الحصر و الانشائى
    يعنى البنات مكتسحة
    اوعى وشك بقى
    و اخيرا ربنا يوفقك مع خالص اعتزازى
    ..............................
    ايه:)
    و انا مبسوطة انك مبسوطة يا ايه و عقبال ما اشوف مدونتك الى خافياها عننا دى
    و بالنسبة للانجاز الكبييييييير
    انا بحس ان اكبر انجاز يستحق اننا نكتب عنه ى انى انسان
    بمعنى تانى تفاصيل الحياة او فلسفتى الخاصه
    ................................
    الكيلانى
    الف الف شكر على احساسك ده
    و عقبال مانردهالك فى المدونة بتاعتك

    ReplyDelete
  6. كل سنة وانتم التلاتة بكل خير
    انتي ونفسك ومدونتك
    تحيااااتي

    ReplyDelete
  7. السلام عليكم
    كل سنه ومدونتك طيبه
    وعقبال 100 سنه وكل سنه حماستك تزيد عن اللي قبلها
    جميله فرحتك بيها حسيتها من خلال كتابتك
    ربنا يوفقك

    ReplyDelete
  8. heba kol sanaw anty dayman tayba w dayman fe atgah el tafawk w dayman batfadfady w dayman ma3a ba3ed

    ReplyDelete
  9. كل سنة و(هي) طيبة :)
    وعقبال مانشوفها واخدة (شهادات) كبيرة

    ReplyDelete