Monday, June 16, 2008

سر عنى



جات تقولى هقولك سر عنى

من الدوشة افتكرته عنى انا

قالتلى انها معجبه بيه

من اول لحظة شافته بعينها

وعلى قد ما حاولت تنساه

معرفتش تعتبره شخص عادى مر فى حياتها

و على قد قوتها الظاهره للعين

حست نفسها ضعيفة, هشه

سبع سنين, مقدوش ينسوها

حبه جواها كان عامل زى الجدر الصلب

غارز. فى جذور قلبها


و غصب عنها فروعه بتطول كل روحها

ومع شوكه, و مع كل نقطة دم ع

كانت بتسيل, مقاومتها كان بتقل

تملكه لها كان بيزيد

بقت متكتفه, شاكه فى كل حاجة حواليها

وكل ده و مش دارى

قلتلها بكل بساطه, ده مش اعجاب, ده حب

وللأسف من طرف واحد

و مش بأيديك عذابك

اقسى احساس بالحب

انك تحسى بالحرمان

عندك الكتير, لكن من غير مقابل

و مفيش بأيديك, غير انك تتعايشى

و ادعيلك , ان ربنا يعوضك بأحساس يسعدك

استغربت, لما لقيتنى فاهمة عذابها

سكت

و غيرت الموضوع

مش قلتلكوا

افتكرته سر عنى انا

4 comments:

  1. AyA
    مش بقولك شبه بعض :) ,, والله العظيم من اسبوع وانا بفكر في قصة قريبة جدا من القصة دي هي عبارة عن واحدة بتحكي قصتها هي عن اللي بتحبه وحتى الكلام قريب من قصتك بس خفت حتى اكتبها وتقع في ايد حد يفتكر ان الهانم (انا) بتحب :) ـ

    ReplyDelete
  2. بجد انا مبسوطة يا ايه انما شبة بعض
    و مبسوطة اكتر انك متابعه الى بكتبة
    بس يل ستى لا يهمك من حد
    سيبى الى يفتكر يفتكر
    هقولك على سر
    انا كمان كنت بخاف جدا ان حد يقرا الى بكتبة
    مش عشان فكرت انه يفتكر انى بحكى عن نفسى
    انما عشان مايقرنيش
    يكتشفنى
    و لحد قريب جدا كان الكلما ده
    بس بينى وبينك انا البلوج نفسة هو الى قوانى
    و بعدين احنا فى الفضاء السيبيى الى بيقولوا عليه
    يعنى ماحدش يعرف هويه حد هنا
    و شوية شوية تلاقى عندك الشجاعن انك تواجى الناس الى تعريفيهم بالى بتكتبية
    بس ابتدى انتى الخطوة
    و سلام مربع لايه

    ReplyDelete
  3. عايزة اسالك على حاجة,, وانا عارفة ان كومنتات مش بتتحط غير لما تشوفيها الاول, انا عملت مدونة... كتبت فيها تلاتة موضوعات او اربعة بس مش نصوص ادبية كلها خواطر وفيه واحد من البوستات كله اساسا سرد ليوم طوييييييل ,,, طبعا مكنتش ناوية اعملها كده بس مود الامتحانات (انا لسه مخلصتش) ماثر فيا شوية ,, المدونة لحد دلوقتي مخفية وعاملاها بباسوورد ليا لوحدي.....ده غير اني حاسة ان مودها كئيب :( وكل اسراري فيها.... اللي كنت عايزة اسالك عليه... حكيتي حاجات من حياتك الحقيقية في مدونتك قبل كده؟ اول ما عملت المدونة قلتي لمين عليها؟
    على فكرة انا مبسوطة بيها اوي وكل شوية افتحها اقراها تاني مع اني مش كاتبة فيها حاجات تتقري لسه بس لما تضيفي صور لمذكراتك مش زي ما تكتبيها في دفتر بقلم .... زي الفرق بين صورة ببعدين وصورة بثلاثة ابعاد....

    ReplyDelete
  4. انت عندك حق فى تشبيهك للصورة الى ب3 ابعاد
    اولا مبروك بالمدونة الجديدة يا ايه
    و عقبال التدوينة الالف ليكى
    و بالنسبة لسؤالك عن انى كتبت حاجة حقيقية فى المدونة
    ايوة كتبت , و كانت اول حاجة انا فتحت المدنة و كتتها فيها هى عن مواقف شخصيل
    كانت 7 مواقف فى سلسلة لحظات سعيدة
    ولولا انى كسولة شوية فى الكتابة
    كنت زمانى كتبت حاجات اكتر من كده
    و بصى يا ايه ماتحاوليش انك تركزى قوى كده على خوفك من ان حد يقرا حاجة عن مدونتك
    و بخصوص ازاى عرفت الناس بمدونتى
    فى الاول انا قلت لصاحبى عليها بالذات الى ليهم ميول للقراءة و مودهم زى مودى و ليهم فى الكتابة كمان
    كمان كاتبه اللينك فى ممعلوماتى فى ال face book
    و كمان عاملها توقيعة فى الايميلات بتاعتى
    بس انتى لو بتسألى عموما ازاى تعرفى الناس عموما فى مدنتك
    فى طرق احسن من كده
    انا اصلى كسولة قوى
    فى انك تقرى مواضيع لمدونين تانين و من خلال الرد هتتكون صداقات و منها هيدخلوا على مدونتك
    و فى كمان مواقع زى بلوجر تايمز او العمانيه بتتشتركى فيها و هناك اى بوست جديد بيطلع هناك و منها الناس تعرف وتدخل على مدونتك
    و بالتوفيق يا ايه

    ReplyDelete