Wednesday, June 4, 2008

لو كنت ما اخفش


لو ربنا ما كانش خلق الخوف, ولو ماكانش فيه خوف فى الدنيا, كان كل واحد غير حاجات كتير فى حياتة, قارات كتير كانت هتتغير و قرارات اكتر ما كانتش اتاخدت, علاقات كتي كانت هتنقطع, و علاقات أكتر كانت هتتوطد, يمكن الدنيا ساعاتها ما كانتش هتبقى بنفس شكلها دوقتى, لأن حتى الخوف من ربنا و من فعل المحرمات و الذنوب هيختفى هو كمان

لوكنت ما اخفش كنت......... ياااااااااه


كنت عملت حاجات كتير و حاجات اكتر ماكنتش هعملها, كانت حياتى هتتغير و يمكن ما كنتش هبقى انا. بس الى متاكده منه , انى كنت هبقى عملت كل الى فى نفسى من غير خوف

مش شرط انجح فيه, و مش شرط ان قراراتى كلها تبقى صح و مضبوطة, لأن الحياة مش مضمونة و هى اساسا تجربة, انما كنت بقيت انا زى ما انا كنت عايزة ابقى

..................................................


لو كنت ما أخفش,كنت دخلت كلية اعلام و كان زمانى صحفية

لو كنت ما أخفش, كنت دافعت عن صداقة عمرى فى وش الى خسرونى أعز صديقة لى, دينا

لو كنت ما أخفش, كنت صممت انى عمرى ما هاكل سمك, لأنى مابحبوش

لو كنت ما أخفش, كنت قلت من زمان انى بحب التمثيل و نفسى أكون ممثلة, و مازلت

لو كنت ما أخفش, كنت اتعلمت بيانو

لو كنت ما أخفش, كنت قلت لناس كتير انى بحبهم, و انى نفسى نكون اصحاب

لو كنت ما أخفش, ماكنتش عيطت و كشيت لما شفت محمد صبحى فى ندوة فى مكتبة الاسكندرية و اكتفيت انى أبصلة من بعيد, بدل ما اتكلم معاه زى ما طول عمرى بحلم

لو كنت ما اخفش, كنت دخلت كواليس مسرحية الملك لير , و سلمت على يحيى الفخرانى

لو كنت ما اخفش, كنت قلت لشخصيات معينة فى حياتى , انى مش عايزة اتعامل معاهم, عشان ما أجبرش انى اعمالهم كويس, بدل ما اكرههم

لو كنت ما اخفش, كنت روحت بيتى بدرى, يم ما مشونا من المدرسة اجبارى فى ثانوية عامة, و فضلت قاعدة على سور المدرسة, خايفة لروح اهلى يفتكرونى مزوغة, و خايفة لحد يشوفنى, يفتكرنى مزوغة

لو كنت ما اخفش, كنت قلت لميس ماجدة مدرسةالعربى بتاعتى فى اعدادى, انى بحبها و بحترمها جدا, و انها أثرت فى قوى

لو كنت ما اخفش, كنت واجهت نفسى بموت جدتى و انى مش هشوفها تانى, بدل ما انا بهرب من الحقيقة دى

لو كنت ما اخفش, كنت غيرت مدرس الكيمياء محمود العلايلى و الفرنساوى عبده رجب, فى دروس ثانوية عامة, لأنى ما كنتش بحبهم و ما كنتش بستمتع بالدرس معاهم

..................................................................


دى كانت دفعة من مخاوفى فى حياتى, اكيد فى حاجات اكتر بكتير , بس محتاجة شوية دعبسة فى النفسية

و اعتذر لأنى مقدتش اقول كل مخاوفى

و السبب انى خايفة

4 comments:

  1. فعلا الخوف هو اللى ييمنع الواحد من انه يعمل حاجات كتير مع ان الواحد لو فكر شوية هيلاقى انه غالبا مش هيخسر حاجة. بس تعرفى انا مبسوط انى سبت العلايلى مع انى اتبهدلت فى الكيميا و جبت 43

    ReplyDelete
  2. أنا مش بدخل على مدونات خالص بس عجبنى كلامك جداً وتصميم البلوج نفسه حتى الأغنية اللى شغالة

    فى كمان أغنية لفرقة أبا معلقه معايه أوى إسمها
    dancing queen

    سعيد إنك تصفحت مدونتك

    إيهاب دسوقى

    ReplyDelete
  3. abo elazm
    عندك حق و الله دايما الانسان بيحط حواجز وهمية لنفسه بالذات فى التعامل مع الاشخاص
    مبسطالك انك سبت العلايلى, حتى بالمجمع ده المهم انك تكون مرتاح مع المدرس بتاعك
    انا فضلت معاه و جبت 47من 50 بس ما كنتش مبسوطة و طلعت من الامتحان بقول يااااااه دى الكيما كانت هتبقى ممتعة جدا فى دراستها ل كانت مع حد تانى غي العلايلى
    ــــــــــــــــــــــ
    ايهاب دسوقى
    مبسطة قوى ان المدونة عجبتك بجد
    و اتمنى انك تتابعها دايما
    و بجد عالم التدوين ده عالم بج واسع شيق جدا انصحك بيه
    و الاغنيه بتاعت
    dancing queen
    من اوائل اغانى فرقة ابا الى سمعتها و علقتنى بيهم
    بس للاسف مش عندى
    تحس كده من اغانيهم انك عايش موود السينات و السبعينات بجد

    ReplyDelete
  4. هي الكيميا بس االى وقعت.... انا الحمدلله خلصت و معيد فى هندسة دلوقتى و كلها كام شهر ان شاء الله و اخد الماجستير
    nice blog , keep it up

    ReplyDelete